SUPERBALITA CEBU

2 ka ‘gunrunner’ nadakpan

BUY-BUST SA ARMAS: Sila si Eladio Socatre (tuo) ug Romeo Torrenueva (tunga), 41, nadakpan sa buy-bust sa pagpamaligyag armas. Si Arlene Genon (wala) naatlan lang nga namaligyag shabu. (Benjie B. Talisic)

DUHA ka mga traysikad drayber nga namasahero sa Barangay Mambaling, Dakbayan sa Sugbo, nadakpan sa Criminal Investigation and Detection Group (CIDG), Metro Cebu tungod sa illegal nga pagbaligya og armas.

Ang operasyon hiniusang gihimo sa CIDG 7 ug Regional Intelligence Unit (RIU) 7.

Si Police Lt. Colonel Niño Briones, team leader sa CIDG, uban sa RIU-7, nihimo og buy-bust operation sa pagpalit og armas.

Ang mga suspek giila nga sila si Eladio Socatre, 54,ug Romeo Torrenueva, 41,pulos mga drayber sa traysikad, taga Sityo Naba sa mao nga barangay.

Matod ni Briones nga ang maong impormasyon gikan sa usa ka impormante nga midangop sa Regional Intilligence Unit.

Giingong si Socatre niadtong tungora gikasabot sa usa ka pulis nga nagpaila kunohay nga sibilyan nga mopalit og armas samtang si Torrenueva maoy gi-contact sa pagdala sa armas kay dunay mopalit.

Wa magtuo ang operating team nga mga trisikad drayber kining duha nga maoy ilang paila, apan sekreto nga mobaligya og armas sa mga nakaila lamang kanila. Mokantidad og P12,000 nga boodle money ang gipalit sa armas. Gituohan usab nga adto sa dakbayan sa Danao kining duha mangompra og armas.

Atol sa buy-bust, usa ka babaye ang naapil sa pagdakop human nga naaktohan nga dunay gitunol nga shabu sa usa ka mipalit kaniya.

Didto nabulabog nga gawas sa usa ka pakete nga una nang nahalin, duna pay lain nga mga pakete sa shabu ang nakuha gikan kang Arlene Genon, 46, silingan sa duha ka mga suspek.

Nakuhaan usab si Genon og usa ka dakong putos nga dunay sulod nga tin foil nga baligya usab kon kinsa ang mopalit.

Sila si Socatre ug Torrenueva mag-atubang og kaso nga kalapasan sa Akta Republika 10591 sa pagtiner og mga armas samtang si Genon paghupot og drugas ug parapernalia. (BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph