SUPERBALITA CEBU

Babaye nagbugno; 1 gidunggab

GIINGONG nagkasungi na ang duha ka mga babayeng manag-agaw, giingong gisunoran pa sa mga tsismis sa kasilinganan hinungdan nga nisangko sa panagbugno ug pagdunggab niadtong Biyernes sa hapon, Disyembre 6, 2019, sa Barangay Poblacion, Moalboal.

Tinuod nga mga ngan sa duha gipugngan ning mantalaan samtang wa pay napasakang kaso.

Si Police Corporal Ronel Quinain, imbestigador sa Moalboal Police Station, niingon nga ang biktimang si Nena, 39, samdan sa liog human dunggaba ni Sophie,39, atol sa ilang panagbugno.

Si Quinain niingon nga ang manag-agaw dugay nang wa magtagad tungod sa selos ug mga tsismis.

Si Sophie nagduda nga ang iyang bana ug si Nena dunay relasyon.

Nakapasamot sa iyang pagduda mao ang giingong tsismis sa mga silingan tali sa iyang bana ug ni Nena.

Si Nena giingong nikomprontase kang Sophie.

Sa pagtinubagay og estorya sa manag-agaw, niinit kini og maayo hangtod nga nagbugno.

Si Sophie nga dunay dalang kutsilyo nakahigayon sa pagdunggab kang Nena tumong sa liog.

Daling gidala si Nena sa Badian District Hospital samtang si Sophie nadakpan sa kapulisan.

Samtang si Police Executive Master Sergeant Christopher Bani nga maoy nag-imbestigar kang Sophie, niingon nga ang suspek nipasangil nga iyang nasakpan ang iyang bana nga dunay relasyon pinaagi sa text messaging.

Iya ning nasakpan mga hapit na usa ka tuig ang milabay.

Mao kini ang hinungdan nganong wa silay maayong pagtinagdanay sa iyang ig-agaw.

Matod ni Bani nga nipasangil si Sophie nga nagpaso-paso sa tugkaran si Nena ingon sa nanghagit.

Iya kining gikomprontase ug sila nagkatinubagay hangtod sa pag-init og maayo, nagkabugno sila.

Matod ni Bani nga si Sophie nakadala og kutsilyo nga iyang gigamit sa materyal sa paghimo og banig.

Iya kining gigamit sa pagdunggab kang Nena apan matod ni Bani maayo na lang nga di hait ang kutsilyo.

Nakagawas na si Nena sa ospital ug desididong mopasaka og kaso batok kang Sophie.

Kasong serious physical injury ang ipasaka batok kang Sophie unya sa Lunes.

Si Sophie gibilanggo sa Moalboal Police Station.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph