USA ka sundalo namatay samtang tulo nasamdan sa pagbusikad sa improvised explosive device (IED) didto sa Barangay Pandaitan, distrito sa Paquibato, siyudad sa Davao sa alas 3:00 sa hapon, Biyernes.
Namatay pipila ka oras samtang gitambalan sa hospital mao si Private first class (Pfc) Dionisio Abalos samtang nasamdan mao sila Corporal Romy Yumang, Pfc. Donald Lapena ug Pfc. Antonio Adlawan sa 69th Infantry Battalion.
Giingon nga mga biktima naglusad og security operations sa lugar human gisakmit sa rebeldeng New People's Army (NPA) ang sakyanan ni House Speaker Prospero Nograles niadtong Huwebes.
Ang militar nagsulti nga mga rebelde nga gipangulohan ni Leoncio Pitao, alyas Kumander Parago ang suspek sa pagpabusikad sa IED nga mipatay kang Abalos ug misamad nila Yumang, Lapena ug Adlawan.
Si 10th Infantry Division commanding officer Major General Carlos Holganza nasubo sa bahin sa kamatayon ni Abalos kinsa nilhan sa katawhan sa Paquibato nga "Kuya Barbero".
"People of Paquibato remember Pfc. Abalos as the barber-soldier who gives free haircut and with a ready smile for children. His heroism and supreme sacrifice in serving our people in a place far away from his home bespeak of the commitment of our soldiers in keeping our citizenry safe. It is unfortunate that he died in an IED explosion planted by NPA terrorists on the roadside that pose danger even to civilians," suma ni Holganza.
Sa laing bahin, base sa taho sa militar, usa ka trabahante sa minahan ang gipusil patay samtang gidagit ang iyang duha ka igsuong lalaki sa mga rebelde sa alas 9:00 sa gabii niadtong Biyernes didto sa Barangay Calabcab, Maco, Compostela Valley province.
Gipusil patay sa unom ka mga armado mao si Felix Valiente Jr. dihang nagdumili siya sa pagkuyog sa mga rebelde uban sa iyang mga igsuon nga sila Jamil ug Jimboy Valiente.
Ang managsuong Valinete pulos trabahante sa minahan didto sa Pamintaran, lungsod sa Maragusan, Compostela Valley province.
Niadtong Sabado, usa ka rebelde ang namatay sa nahitabong engkwentro tali sa militar didto sa Barangay Sibulan, Sta. Cruz, Davao del Sur sa alas 9:00 sa buntag.
Giila ang namatay nga mao si Ernesto Baldevieso, alyas Noknok kinsa sakop sa New Peoples' Army nga gipangulohan ni Exequiel Daguman.
Nahitabo ang engkwentro dihang miresponde ang mga sakop sa 72nd Infantry Battalion sa taho sa mga molupyo nga dunay mga armado sa ilang lugar.
Nakuha gikan sa napatay nga rebelde ang usa ka Garand rifle ug mga bala sa maong armas. (AD)