DEAR Papa Joe,
Tawaga lang ko sa ngalan nga Raymond, 30 anyos na ang panuigon, usa pa ka ulitawo. Wa pa ko kauyab kay taas ang akong standard sa babaye. Gusto ko gwapa, taas ug loving.
Actually, naa koy mga kaila nga ing ana pero flirt. Di ko ganahan og flirt nga babaye. Pero nagkaedad na ko, ang gusto sa akong mama nga maminyo na ko kay diabetic siya. Basin mamatay siya ug di siya kaabot sa iyang apo. Pero unsaon man nga wala man gyud. Naay usa ka babaye nga willing siya magpagamit nako kay type daw ko niya, pero di man nako siya type bisan one night stand lang daw. So, mao to akong gihatag niya, nag one night stand hangtod nag pila na ka nights.
Mao ni akong problema ron kay sa dugay namong nilapaay sa leon ug karnero, nakabatyag na man ko og gugma pero di man siya akong ideal girl. Palihug tambagi ko.
RAYMOND
Raymond,
Kon ang gugma na gani ang molihok, ayaw pagdahum magpili pa kini. Mura nig kilat ba nga kon para imo gyud, aw igo ka.
Follow your heart. Basin gipamata na ka nga di tanan pwede maatua. Daghan pa na naa siguro anang bayhana nga wala pa nimo makit-i nga makasamot pa sa imong gugma niya. Di na ikauwaw kon di ing ana ka hitsuraan atong pares. Ang importante magmalipayon ka uban niya. Kana lang ug salamat.
Papa Joe
(sa inyong tampo ipadala sa papajoesuperb@gmail.com)