Mga duwa karon
6:30 pm. - UV vs. USPF
8:00 pm. - UC vs. SWU
Hugot ug kulbahinam nga panag-engkuwentro ang masaksihan karong gabii sa pagpadayon sa 2019 Minglanilla Mayor’s Cup Inter-collegiate Christmas League sa dihang magtakos ang mga nag-unang college teams sa Sugbo diha sa Minglanilla Sports Complex.
Ang University of Cebu (UC) Webmasters, ang runners-up sa miaging tuig, ug ang Southwestern University-Phinma (SWU) Cobras, ang bag-ong Cesafi champion, sa unang higayon, mag-abot sa main game nga sugdan sa alas otso sa gabii.
Panagtigi tali sa duha ka mga import sa matag habig ang gituohan nga mokuha sa atensiyon sa kagabhion.
Samtang ang Cobras ni coach Mike Reyes moparada sa ilang reinforcement nga si Thiam Lamine sa Senegal, anaa usab si Tosh Sesay sa Webmasters ni coach Raul “Yayoy” Alcoseba, ang third placer sa Cesafi.
Balansing kombati ang gipaabot nga masaksihan sanglit ang duha ka koponan mosulod sa korte nga adunay mga bag-ong kaplag nga mopakita usab og aksyon.
Gawas sa mga beteranong sila si Shane Menina, John Jabello, Paul Galinato, ang Webmasters milakip usab sa ilang mga kanhi high school star players nga sila si Isiah Hontiveros-Blanco, anak ni kanhi PBA star Dondon Hontiveros, James Incio ug James Lapasa.
Sa ilang bahin, ang kasamtangang Cesafi MVP nga si Shaq Imperial maoy mangulo sa mga locals sa pagsuporta ni Lamine.
Uban kaniya mao sila si Dyll Roncal, Red Cachuela, Kent Sanchez, Ramish Alforque ug William Polican.
Ang defending champion University of the Visayas (UV) Green Lancers ug ang University of Southern Philippines Foundation (USPF) Panthers magsangka sa preliminary match sa alas 6:30 sa gabii.
Kagahapon, Disyembre 8, ang UV misugod pagdepensa sa ilang kampiyonato pinaagi sa pagpakigsangka sa University of San Jose Recoletos (USJ-R) Jaguars.
Sa opening day niadtong Sabado, ang Panthers mipukan sa Jaguars, 91-79, sa kulbahinam nga duwa diin diha na sa naghinapos nga bahin natino ang kadaugan sa Panthers.
Ang import nga si Sameen Swint mipakatap og 27 puntos, lakip niini ang mga krusyal nga syat sa hinapos nga bahin nga maoy nagwanang sa dalan sa kadaugan sa Panthers.
Ang Jaguars nga miduwa nga wala ang ilang import gipangulohan ni Elmer Delvo Echavez Jr. nga may 16 puntos ug Kendrick Abarquez kinsa midugang og 13.
Mga puntos
USPF (91) - Swint 27, Chavez 16, Langahin 14, Mendez 9, Cuizon 7, Aguilar 5, Colina 4, Garong 4, Patalinhug 3.
USJ-R (79) - Echavez 16, Abarquez 13, Gilbuena 13, Tabio 13, Minoza 8, Rodriguez 8, Guibao 8, Pascua 3. (JBM)