WALA’Y kaluoy nga gipanglubong og taga liog sa Team Pilipinas ang Myanmar, 136-67, niadtong Sabado sa gabii sa men’s basketball event sa 30th Southeast Asian Games sa Mall of Asia Arena.
Ang Gilas Pilipinas ning-abante sa semi-finals isip lider sa Group A diin wala sila’y pilde sulod sa tulo ka mga duwa.
Labing kuyaw nga nakaduwa alang sa Gilas Pilipinas mao si Matthew Wright, kinsa nagpauwan og 29 puntos.
Ning sangkaa, wala na gamita ni Gilas coach Tim Cone sila si JuneMar Fajardo ug Stanley Pringle aron makapahuway kini alang sa mas dako nga tahas sa semi-finals.
Sa press time, ang Gilas padayon pang nakigbatok sa Group B No.2 Indonesia sa semi-finals. (ESL)