Sugbo padayong miamot og gold

GOLD. Mao kini ang No.1 golf player sa Sugbo nga si Lois Kaye Go, kinsa nakatampo og gold medal alang sa Pilipinas kagahapon. (BCEAGLE.COM)
GOLD. Mao kini ang No.1 golf player sa Sugbo nga si Lois Kaye Go, kinsa nakatampo og gold medal alang sa Pilipinas kagahapon. (BCEAGLE.COM)

PADAYON ang Sugbo sa pag-amot og gold medal alang sa Pilipinas sa ikasiyam nga adlaw nga kombati sa 30th Southeast Asian Games sa kaulohan.

Ang No.1 shotmaker sa Sugbo nga si Lois Kaye Go kauban si Bianca Isabel Pagdanganan ninglabni sa gold medal sa women’s team matchplay golf event kagahapon sa Luisita Golf and Country Club sa Tarlac City.

Ang panagpares nila ni Go ug Padanganan minglupig sa panag-uban nila ni Ashley Lau ug Natasha Oon sa gold medal match.

Nakarehistro ang mga Pinay og 136 kumpara sa nahimo sa Malaysians nga 140.

Gilupig ni Pagdanganan si Oon sa 16th hole, 62-65, dayon gisundan kini og kadaugan ni Go batok kang Lau sa 18th hole, 74-75.

“It was so nerve-racking because Ashley is a great player. Anything can happen in match plays, so I decided to stick to my game plan,” matod ni Go, kinsa produkto sa junior golf program sa Cebu Country Club.

Si Go naghashas og insakto sa iyang abilidad sa University of South Carolina sa Amerika.

Kini maoy ikaduhang gold medal nga naangkon ni Pagdanganan human niya gipatigbabawan ang women’s individual stroke play niadtong Biyernes.

Sa Decawake Clark Cable Park, ang Sugboanong si Raphael Trinidad nakabira og silver medal sa men’s wakeboarding.

Si Trinidad, kinsa lumad nga taga lungsod sa Liloan, Cebu, nakatigom og 69.33 puntos.

Ang gold medal winner nga si Sanya Phonthip sa Thailand adunay 72.67 puntos.

Ang laing Pinoy nga si Ralph Gello Villaro maoy miangkon sa bronze medal pinaagi sa 61.00 puntos.

Mga alas 5:30 sa hapon kagahapon, padayong ningsulbong ang Pilipinas sa medal standing ug nakatigom na kini og 98 ka gold medals, 72 ka mga silver ug 82 ka mga bronze.

Sa miagi pa lang adlaw dihang miabot og 72 ang gold medals sa Pilipinas, hayan naseguro na niini ang overall title apan wala milugak ang mga atleta niini.

Nalabwan na sa Pilipinas ang 91 ka gold medals nga nakuha sa nasod nga nakapahimo niining overall champion sa katapusang pag-host niini sa kompetisyon niadtong 2005.

Ang nagsunod sa Pilipinas ning higayuna mao ang Vietnam nga adunay 52 ka mga gold, 53 ka mga silver ug 68 ka mga bronze samtang ikatulo ang Thailand nga adunay 49-64-65 medal tally.

Sa laing bahin, ang Timor Leste makabaton na gyud og medalya sa matag duha ka mga tuig nga kompetisyon nga gikombatihan og 11 ka mga nasod.

Ang Timor Leste nakaseguro na og bronze medal sa women’s taekwondo nga posible pang mosaka sa gold.

Ang hashtag #TimorLeste nag-viral sa online gumikan sa pagdasig sa Filipino netizens aron makaangkon ang Timor Leste sa labing unang medalya niini sa kompetisyon. (RSC, ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph