Nadela: Panglawas unaha taliwa sa Christmas parties

NAGHITAK ang Christmas party rong panahona. Nagbaha ang pagkaon ug nag-awas awas ang ilimnon. Naay mainom para tambal sa luod. Naa say gitawag nila nga pangpahilis nga kon malab-anan makaburyong sa utok ug usahay mawad-an sa kabuot.

Mao kini hinungdan nga ang Department of Health kun DOH nagpahinumdum sa publiko nga magmabinantayon kanunay sa ilang gikaon ug giinom basin kong mayayay. Kamatuoran niini lapad kaayo ang listahan sa mga pasyente matag human sa Pasko kansang panglawas naapektuhan kay nasubrahan. Di lang sa kaon ug inom, apil na ang pahulay nga gikinahanglan sa lawas tungod sa daghang imbitasyon ning panahon sa Pasko. Pulong pa sa usa ka higalang doktor, daan nang tandugonon unsaon gipasubrahan man maong nalandig sa tambalanan. Laing pasidaan sa DOH kining pagkaon nga di maayong pagkaluto. Apil na ang pagkaon nga subra sa party unya initon lang kay nangayawat nga mapuslan pa.

Delikado sab ni labi na sa pagkaon nga nagamo na. Daghan na ang nahimong biktima sa food poisoning. Usa ni sa bantayanan kaayo ilabi na sa mga bata nga maka kaon og subra o di maayong pagkaluto nga pagkaon nga idalit sa mga party nga tambongan. Aron makasiguro ang mga ginikanan, mo-monitor unsay gisima-sima sa ilang mga anak. Sa mga magpa-party sigurohon nga way panglawas nga maapiki.

***

Taas nga bakasyon alang sa Pasko ang atong paabuton unyag sira sa klase sa mosunod nga mga adlaw. Daghan na ang nagplano nga mopauli sa probinsiya. Daghan sab ang gustong mosulay nga magpa bukid tungod sa daghang kasuroyan didto sama sa beach, water falls ug daghan pa. Kadtong mopili og mas duol duol nga kasuroyan, sulayi ang Boacao Falls nga nahimutang sa Barangay To-ong sa dakbayan sa Sugbo. Kulang pa ni sa mga gikinahanglang infrastraktura apan mahimo na nga kaliguan. Si Kapitan Allen Borres nipahibalo nako nga dugay na kaayo siyang nangandoy nga maugmad ang Boacao Falls ngadto sa usa ka tourist destination. Galing lang tungod sa dakong panginahanglan sa pundo wa pa gyud ni kahatagi og katumanan.

Wa pa ko ka adto ning dapita, pero sigun sa estorya sa nakaligo na didto, ang ilang giingon hilabihan ka nindot ang Boacao Falls. Samot na kong mahatagan kini sa pagtagad. Duna koy mga coverage kaniadto sa Barangay To-ong lahos na ngadto sa silingang barangay nga mao ang Pamutan, di man ni layo gikan sa dalan Colon. Mahimong adto moagi sa Barangay Buhisan. Pwede sab sa Barangay Sapangdako tangas padung sa sitio Baksan. Sa Talisay side, pwede sab agion sa Barangay Jaclopan. Gani, karon suma ni Kapitan Borres nagpadayon na ang trabaho sa karsada nga ari moagi sa Barangay Poblacion Pardo deretso sa sitio Badiang nga gipasiugdahan sa engineers sa city hall. Sa ato pa mosamot na ka duol. Matod ni Kap Borres duna nay taga Cebu Ciity Hall nga namisita sa Boacao Falls kaniadto sa tinguha nga kini mapanindot.

Manghinaot ta nga mahatagan kini og prayoridad sa administrasyong Labella. Dako kaayong bentaha kay sa akong giingon sa unahan nia ra ni sa atong kaugalingong nataran.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph