Bag-ong garbage trucks gamit na

File photo
File photo

MGA bag-ong garbage compactor truck sa Cebu City Government mao na ang mangolekta sa mga basura sa dakbayan human natapos na ang kontrata sa Jomara Konstruckt.

Kini ang gibutyag ni Engr. June Maratas, pangulo sa Department of General Services (DGS) ug chairman sa Bids and Awards Committee (BAC) nga nahurot na ang P25 milyunes nga gitagana para sa pagkolekta og basura sa Jomara niadtong Nobiyembre 28.

Si Maratas nagkanayon nga sugod karong buwan sa Disyembre, ang City Government dili na moabang og mga hauler sa koleksyon sa basura para makadaginot ang dakbayan og di mominos P50 milyones matag tuig sugod 2020.

Apan iyang giklaro nga padayon nga mag-abang ang City Government og hauler para sa disposal, gikan sa transfer station sa Inayawan paingon sa landfill.

Gitug-an ni Maratas nga adunay P43 milyones nga ilang gitagana para sa bidding aron maandam na kini inig kahurot sa P41 milyones nga budget nga posibleng mahurot karong Disyembre 22.

Iyang gipahibawo nga naabot na sa miaging semana ang rehistro sa 21 ka garbage compactor trucks nga gipalit sa miaging administrasyon nga maoy nidugang sa 11 ka dumptrucks nga aktibo sa Department of Public Services.

Si Mayor Edgardo Labella una nang nipadayag human niabot ang maong mga compactor truck niadtong buwan sa Nobiyembre nga dili na mo-outsource ang City Government og hauler aron maka-save ang siyudad.

Gilauman nga ang bag-ong garbage trucks makatabang og dako sa paghipos sa mga basura sa dakbayan. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph