Mga kanhi adik gigamit sa kampanya sa gidiling druga

MGA kanhi adik nipasabot sa dautang epekto sa drugas ngadto sa mga tinun-an.

Aron mas masabtan ang dautang epekto, mga kanhi adik sa gidili nga drugas ang nipahinumdum sa mga tinun-an sa Talisay City Central School ug sa High School kalabot sa drugas.

Usa kini sa mga kabag-uhan nga gihimo sa kapulisan sa dakbayan sa Talisay ug sa Barangay Anti-Drug Abuse Council (Badac) sa Barangay Poblacion.

Niadtong Biyernes sa buntag, Disyembre 06, isip kabahin sa programa aron pagminus ug hingpit nga pagwagtang sa kabataan nga malambigit pa sa illegal nga drugas, nakita nila nga epektibo kon ang kanhi adunay kasinatian ang mobatbat atubangan sa mga tinun-an.

Usa sa mga kanhi nagumon sa drugas, nga benepisyaryo sa libre nga Aftercare Program sa kagamhanan sa dakbayan sa Talisay, nipasabot sa kabataan kon unsa ang iyang kinabuhi sa dihang grabe ang iyang pagka adik.

Giangkon sa usa ka 32 anyos nga Talisaynon, usa ka kanhi adik, nga ang mga batan-on ang dali agnihon sa illegal, ilabi na tungod sa peer pressure, hinambog ug uban pa.

Apan gitug-an usab niini kon unsa ka susama og walay bili na ang kinabuhi kon magumon sa drugas.

Si Konsehal Jefferson Seguerra, chairman sa committee on peace and order sa Barangay Poblacion, nitug-an sa mga tinun-an nga sila ang gitutokan, kay gawas nga maoy dali maagni, sila usab ang kaugmaon sa katilingban.

Sa miaging operasyon sa kapulisan sa TCPS, giangkon ni Pelare nga aduna gyuy mga tinun-an ang ilang nasakpan nga nanagsuyop og shabu.

Hinungdan nga usa kini sa ilang gipatabangan sa aktibo nga programa sa BADAC. Kini aron dili ra puros dakup ang himuon, kundi ang pagminus usab sa mga mogamit pa.

Ang kapulisan adunay nagkadaiya nga programa aron sa pag-agni pa sa mga vulnerable nga mahimong biktima sa drugas nga dili mahitumpawak sa kadautan. (FMD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph