SUPERBALITA CEBU

Sikyu sa gabii, drug pusher sa adlaw nadakpan atol sa buy-bust

USA ka guwardiya ang nasikop sa kapulisan atol sa buy bust sa Sitio Sta. Cruz, Barangay Calamba, dakbayan sa Sugbo niadtong Sabado sa gabii, Disyembre 7.

Ang nasikop mao si Wilfredo Cuizon alyas 'German', 42, ug molupyo sa nahisgotang dapit.

Mga ahente sa Philippine Drug Enforcement Agency (PDEA) 7 ang nihimo sa malampusong operasyon.

Si Cuizon kanhi sakop sa Department of Public Services (DPS) sa Cebu City Hall sa miaging administrasyon.

Nisulod sa pagka guwardiya ug bag-o lang nadestino sa buhatan sa Social Security System (SSS) sa Banilad.

Apan kini nag-sideline sa pagpamaligya og shabu sa adlaw, diin giangkon kini sa suspek atol sa pakighinabi kaniya sa Superbalita Cebu.

Human nakadawat og tip ang awtoridad bahin sa kalihokan ni Cuzion, ilang gipanid-an kini sa wala pa gilusad ang buy bust pinaagi sa poseur buyer sa PDEA 7 ug naposasan ang suspek.

Atol sa buy bust, si Cuizon nakuhaan kini og 50 gramos nga shabu nga moabot og P340 mil ang kantidad subay sa iyang Dangerous Drgus Board (DDB) value.

Duna usab nasakmit sa mga ahente sa PDEA-7 nga drug paraphernalia nga nagpamatuod nga anha lang niini buakon ang mga shabu nga ihatud kaniya gikan sa iyang supplier.

Sa maong buy bust, nadakpan usab si Roniel Arriesgado, 29, kinsa naabtan usab sa maong lugar nga nagpaabot kang Cuizon nga tagaan siya sa iyang gipalit balor og P250 nga shabu.

Ang dinakpan nga si Cuizon niangkon nga tungod sa kagamay sa iyang suweldo isip security guard hinungdan nga napugos kini sa pagpamaligya sa adlawan samtang nagtrabaho sa pagkaguwardiya matag gabii sa SSS office sa Banilad, siyudad sa Sugbo.

Napriso na siya human madakpi sa paghupot og gidili nga drugas sa miging tuig.

Ug usa ka tuig sa prisohan niadtong Septiyembre ning tuiga, usab nakagawas kini human mahatagan siya sa plea bargaining nga usa ka programa sa kagamhanan ning ulahi aron pagpaluag sa mga bilanggoan nga nanaghuot.

Matod ni Cuizon, usa na ka buwan siya nibalik sa pagpamaligya og ilegal nga drugas human makagawas sa prisohan.

Ang iyang mga kustomer moanha lang sa panimalay aron mopalit.

Natanggong og balik si Cuizon sa prisuhan tungod sa samang kalapasan sa balaud sa gidiling druga.

Kaso sa pagpamaligya ug paghupot og gidiling druga ang atubangon ni Cuizon nga kalapasan sa Akta Republika 9165 sa Dangerous Drugs Act of 2002.

Ang mga sakop sa PDEA 7 padayon sa ilang pagpaniid sa ubang mga tigpyuhot og gidili nga druga. (BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph