USA ka bus sa Ceres Liner ang nalimbuwad kagahapon sa buntag, Dominggo, Disyembre 8, sa Barangay Panalipan, lungsod sa Catmon, dili mominos 21 ang angol sa 25 ka mga pasahero.
Ang bus gikan sa lungsod sa Tabugon ug nagpadulong sa North Bus Terminal sa siyudad sa Mandaue.
Matod ni Police Corporal Virgil Otiz, traffic investigator sa Catmon police, nga alas 7:55 gahapon sa buntag nakadawat sila og tawag gikan sa concerned citizen nga adunay bus nga natumba sa maong lugar.
Dali sila nga niresponde ug ilang naabtan ang Ceres bus nga natumba na daplin sa baybayon sa Panalipan nga gimaneho ni Iglecerio Cano-is Landero, Jr., 36, taga Barangay Ipil, lungsod sa Carmen.
Gibutyag sa drayber sa bus sa gihimong imbestigasyon sa Catmon Police Station nga samtang nagsubay siya sa national highway sa maong barangay, kalit lang nga mitakilid paingon sa walang bahin sa karsada ang iyang gi manehong bus.
Iyang gihinayhinay sa pag tunob iyang brake ug iyang gi bawi ang manobela pa tuo apan wala na kini niya ma-control og mibangga gyud kini sa concrete barriers sa kilid sa karsada.
Nabangga pa siya sa punoan sa lubi ug hinay nga nahulog sa bakilid nga adunay gitas-on nga lima ka tiil apan gihulagway kini sa driver nga inanay lang ang pagkatumba.
“Nabantayan niya nga medyo takilid iyang sakyanan padung sa left side. Ang iyang gibuhat mi-apply siyag brake, wala daw niya gi-full brake ni bawi siya sa right unfortunately nilahos gyud siya didto sa may barriers and then nahulog didto sa cliff gamay may gani kay naay lubi,” matod ni Ortiz.
Duha ngadto sa tulo ka mga pumpboat ang nangadanyos tungod kay didto natumba ang Ceres bus.
Sa 25 ka mga pasahero, 21 niini ang nadali pagdala sa tambalanan sa district hospital sa lungsod sa Sogod diin usa niini ang gidala sa Danao Provincial Hospital ug gibalhin usab sa Vicente Sotto Memorial Medical Center (VSMMC) sa dakbayan sa Sugbo nga giila nga si Cesar Roldan, 79 nga taga Corazon, Catmon.
Kasamtangan nga gi kustodiya sa Catmon Police Station ang drayber nga si Landero samtang nagpaabot sa reklamo sa mga biktima.
“After reglementary period ma-release nani namo ang driver kung matod ni Ortiz sa Superbalita Cebu
Dugang niya nga sigun sa pamahayag sa drayber nga sa wala pa siya mo-drive sa maong unit, aduna nay susama nga insidente ang nahitabo ug gipahimangnoan na siya sa iyang kaubang mga drayber nga dili mokompyansa sa pagmaneho.
Kon adunay moreklamo nga pasahero, mag-atubang ang drayber og kasong reckless imprudence resulting in multiple physical injuries.
Misaad na hinuon ang kompanya nga moabag sa gasto sa tambalanan sa mga nangaangol. (AYB)