MOABOT lang sa 28 gikan sa 53 ka local government units sa Sugbo ang niisyu og executive order batok sa African Swine Fever (ASF), apil niini ang duha ka independent cities sa Sugbo ug Lapu-Lapu.
Kini ang nahibaw-an ni Gobernador Gwen Garcia atol sa tigom sa Provincial ASF Task Force niadtong Biyernes, Disyembre 6, human pipila ka mga rehiyon palibot sa Central Visayas ang nibakwi na sa ilang ban batok pagpasud sa buhi nga mga baboy ug mga produkto nga gikan sa karne sa baboy nga gikan sa Luzon.
Sigon ni Provincial Veterinarian Mary Rose Vincoy nga base sa ilang uwahi nga tally nabutyag nga 23 lang ka mga lungsod ug lima ka mga siyudad, apil ang mga siyudad sa Sugbo ug Lapu-Lapu, ang niisyu og EOs batok sa ASF.
Nasagmuyo sa kalamboan, gipahimug-atan ni Gob. Gwen Garcia ang panginahanglan nga tibuok nga kooperasyon sa tanan aron mapanalipdan ang P11 bilyones nga industriya sa baboy sa Sugbo.
Iyang gipadayag nga ang pagpamuhi og baboy ang panginabuhian sa ubang mga mag-uuma sa kalungsuran.
Si Jerome Gonzales, provincial director sa Department of Interior and Local Government sa Sugbo, nipasalig sa task force nga ilang padad-an dayon og suwat ang 25 ka mga LGU ug pahinumduman. (RTF)