SUKAD na presidente si Pangulong Rodrigo Duterte, daghang mga kahiwian sa milabay nga administrasyon ang nangabulgar nga nagpabiling tinago, nga ang nakahimulos ang mga dagkong mga politiko ug mga negusyante sa atong nasud.
Sa nanglabay nga administrasyon, gipasagdan ang utang ni Lucio Tan nga balor og P3 Bilyon, walay gobyernong naningil, apan sa dihang milingkod na si presidente Duterte iyang gisingil ug gibayran gyud ni Lucio Tan, sulod sa napulo ka adlaw ug kon dili gyud mobayad, pasirad-an sa presidente ang Ninoy Aquino International Airport Terminal 3 nga gi-ukopar sa Philippine Air Lines (PAL).
Resulta, mibayad ang dakong negusyante nga si Tan sa maong kantidad nga utang niya sa gobyerno nga gipasagdan sa mga talawan nga presidente gikan ni Presidente Fidel Ramos, Joseph Estrada, Gloria Macapagal-Arroyo ug Benigno Aquino.
Sukad sa kasaysayan sa panggobyerno sa tibuok kalibutan, karon pa kita makasinati nga ang gobyerno, gipaylan og kaso sa mga negusyante kay nalugi sila sa ilang negusyo, ug ang kaso didto pa gayud gi-file sa permanent court of arbitration sa nasud Singapore.
Ang tubig nga natural resources gikonsidera sa kontrata nga commodity, labaw sa tanan, dili makapanghilabot ang atong gobyerno kung magpataas sila sa presyo sa matag cubic meter sa tubig, ug kung, manghilabot ang gobyerno maoy ilang pabayron kung malugi sila, kung mao, sila na ang gobyerno?
Sabotahi sa ekonomiya, gusto sa mga negusyante ug mga yellow-han nga mahagsa ang administrasyong Duterte, nga pabor sa mga pobreng Pilipino ug dili pabor sa mga negusyante nga kuptan ang liog sa atong gobyerno, butang nga dili gustong mahitabo ning kasamtangang administrasyon.
Gobyerno batok sa mga negusyanteng mapahimuslanon, asa ka dapig? Kini na tingali ang panahon nga magpakita ang katawhang Pilipino og suporta sa atong presidente tungod kay kini nga laban, para sa katawhan ug dili para sa iyang kaugalingon.
Dili sa unsa paman, tingali og ang nanglabay nga presidente nakadawat ug bahin niining transaksyona mao nga hilom ug ginakutan ang baba.
Sa inyong pagtuo? Panahon na kaha nga atong suportahan si Presidente Duterte niining iyang kawsa, nga gibaboy sa mga dagkong negusyante ang atong gobyerno?
Tugotan ba nato nga ang atong gobyerno ubos na sa mga dagkong negusyante? Nga kon malugi sila sa negusyo, buhis na sa katawhan ang atong ibayad sa ila?
Suportahi ang atong presidente, kay ato kining tanan.