KUNG bulan na sa Disyembre, perteng lipaya na gayod sa mga miyembro sa Lesbian, Gay, Bisexual, Transgender, and Queer (LGBTQ) sa Davao City kay lagi matigayon na sab ang tinuig nga LGBTQ Party sa dakbayan.
Ang maong programa, gipasiugdahan niadto ni kanhi mayor ning dakbayan ug karon mao si Presidente Rodrigo Duterte isip kabahin sa Pasko Fiesta ning siyudad nga padung na sa mag-usa ka dekada ang maong aktibidad, matag tuig.
Kay mga Duterte man gihapon ang nagdala sa siyudad sa Davao, siyempre napadayon kini nga programa, diin sa misunod nga mga tuig, mas gipa-bongga, gipagahut, gipahugyaw, puno sa mga papremyo ug kalingawan, ug ang tumang gikalipay mao ang paghatag sa mga gift certificates (GC).
Niadto, duna pa'y pakapin ang sobre nga dunay P1,500 nga GC, dunay P200 isip pamasahe sa mitambong. Malipayon nga mouli, uban sa pangindahay nga sa mosunod nga tuig, makaangkon na sab og hinatag nga ticket gikan sa grupo.
Sa paglabay sa mga katuigan, di malikayan nga duna gyo'y mopasibaw sa ilang panglantaw, sama nalang nga sa una kuno, hayahay kaayo kay airconditioned ang function hall sa event.
Kahinumdoman, diha'y natigayon sa iladong mga hotel ug sa iladong Mall ug mga function halls. Apan, ning bag-o lang, Sabado sa gabii didto kini natigayon sa Davao City National High School (DCNHS) oval ground.
Kay, “Rave Party” kuno, maong didto kini natigayon diin wa nasayran mibundak ang ulan, resulta, nagtigmi sa kalapok ang dapit. Nangabasa ang mga miyembro sa LGBTQ, daw mga sisiw nga nangabasa sa ulan.
"Mohangyo lang pod unta mi sa sunod nga sa mga hotel nalang or bisan sa DavCon, or SM hall mas mabati pa namo ang socialization, grabe pod oi, perte gyud lapuka, luoy kaayo ang mga LGBTQ," saysay sa usa ka miyembro sa LGBTQ nga wala nagpaila.
Sa bahin sa organizer, dili masayran nga moulan, mas maayong natigayon sa abli nga dapit labi ang 'Rave Party'. Giingon nga mag-depende sa theme aron maplastar kung asa ipahigayon ang party.
"Mas nindot diri sa gawas, kay open kaayo, rave party man kini, so wala gyu'y naka-gown, di ba? nindot ang LGBTQ party not last year, previous years, but also today," saysay sa usa ka miyembro nga taga Agdao.
Bisan paman nga nangabasa ug nagkalapot ang ubang miyembro, sa katapusan dako ang pasalamat sa tanan labi na sa lokal nga panggamhanan sa Davao City nga mihatag gayod og importansya sa LGBTQ community.
Nagpasalamat ang tanan sa GC nga ilang nadawat ug sa kasadya nga gikan sa nagkadaiyang talento ning maong komunidad.