PIKIT, North Cotabato -- Dumot sa pamilya ang gitan-aw nga motibo sa mga awtoridad sa pagsulong sa mga armadong tawo alas 3:25 sa hapon niadtong Sabado sa probinsiya sa Cotabato.
Giila ang napatay nga si Kunti Sansawi, 62-anyos ug naangol sab ang iyang inahan nga si Pidsimayo Sansawi, 80-anyos, mga molupyo sa Barangay Bualan, Pikit, North Cotabato.
Gibutyag ni Pikit Chief of Police, Major Mautin Pangandigan nga samtang nangape ang mga biktima sulod sa ilang balay, kalit lang mibutho ang wala mailhing mga armadong lalaki ug gipabuthan sila gamit ang M16 Armalite rifles.
Abtik sab nga miikyas ang mga suspetsado human nakahibawo nga niresponde ang mga sakop sa Citizen Armed Forces Geographical Unit ug Barangay Peacekeeping Action Team.
Patay diha-diha si Kunti human naka-angkon og samand pinusilan sa nagkadaiyang parte sa iyang lawas.
Gisapupo sab sa iyang pamilya ang inahan sa biktima nga anaa karon sa grabeng kahimtang sulod sa Cotabato Provincial Hospital sa Barangay Amas, Kidapawan City.
Aduna na'y mga tawo nga gidudahan ang pamilya sa biktima nga maoy namusil sa ilaha gumikan sa rido o dumot sa pamilya.
Padayon pa ang imbestigasyon sa kapulisan mahitungod sa nahitabo.