IGACOS, Davao del Norte -- Padayong gitambalan ang usa ka laborer nga gitigbas sa laing laborer nga iyang gisumbag sa Purok 5, Barangay San Isidro, Babak District alas 5:40 sa hapon, Disyembre 7.
Ang biktima giila nga si Joeril Simbayan Danas, 26-anyos, samtang giila ang suspek nga Sonny Cabase Danas, 46-anyos parehong molupyo sa nahisgutang dapit.
Base sa inisyal nga imbestigasyon, ang biktima miabot sa maong dapit gikan sa Barangay Libuak, Babak District, nga gituohang ubos sa impluwensiya sa ilimnong makahubog ingon man ang suspek kinsa naglingkod sa duyan.
Gikompronta sa suspek ang biktima sa sayop niining gihimo niadtong Disyembre 5 diin gipahiyusan sa biktima ang ligid sa motorsiklo sa anak sa suspek.
Giingog nasuko ang biktima hinungdan nga iyang gisumbag ang suspek sa makaduhang higayon, apan nakalikay ang suspek ug miadto sa balay ug nagkuhang sundang dayong mibalik ug gitigbas ang biktima nga naigo sa ulo ug abaga.
Dali dayon nga gidala ang biktima sa Davao del Norte District Hospital, Samal Zone pinaagi sa mga miresponde nga sakop sa Davao City Disaster Risk Reduction and Management Council aron matambalan.
Kasamtangan gikustodiya ang suspek sa Babak Police Sub-Station alang sa tukmang disposasyon.