KABACAN, North Cotabato -- Mi-atake na sab ang grupo sa mga kabatan-onan ug gipangsunog ang usa ka boarding house ug tulo ka tindahan alas 3:00 sa kaadlawon, Disyembre 8 sa probinsiya sa Cotabato.
Matud ni David Saure, pangulo sa Kabacan Municipal Disaster Risk Reduction and Management Office nga unang midilaab nga dakong kalayo sa usa ka boarding house sa Barangay Poblacion, Kabacan, North Cotabato.
Gisundan sab kini sa pagkasunog sa tulo ka tindahan unahan lang sa boarding house.
Dali dayon nga niresponde ang mga sakop sa Bureau of Fire and Protection (BFP-Kabacan) ug mga kasikbit nga kabomberohan diin nagtinabangay kini sa pagpalong sa kayo.
Gideklara nga fire-out sa BFV ang upat ka mga sunog sa Kabacan alas 5:15 sa buntag.
Tulo ka batan-on o mga menor de edad ang nakit-an sa mga molupyo nga maoy nagsunog sa boarding house ug tulo ka tindahan.
Niadtong milabay nga gabii adunay mga balay sab ug tindahan ang naugdaw sa Kabacan diin usa sa mga suspek nga bata kinsa na-rescue sa mga awtoridad.
Sa kasamtangan, ang kapulisan ug BFP-Kabacan ang padayon nga nag-imbestiga sa sunod-sunod nga sunog sa lungsod diin mga bata ang suspek sa maong hitabo.