GIKALIPAY sa kapulisan ang pagsuporta sa mga ginikanan ug komunidad sa usa sa mga programa sa kapulisan sa siyudad sa Cagayan de Oro.
Gilusad ang mobile library "Titser Pulis" niadtong Biyernes, Disyembre 6 diha sa Mother Ignacia Village, Zone 8, Barangay Carmen, ning siyudad sa Cagayan de Oro.
Gibutyag ni Police Lieutenant Colonel Alexy Sonido, ulo sa City Mobile Force Company (CMFC) sa Cagayan de Oro Police Office (Cocpo), nga malipayon sila sa suporta sa komunidad sa nahisgutang program pinaagi na sa Regional Director nga si Brigadier General Rolando Anduyan.
"Siyempre natutuwa tayo dahil sinuportahan tayo ng barangay, ng community na tumugon po sa ating paanyaya para po suportahan itong programa ng ating regional director," matud ni Sonido.
"Mag-identify po tayo ng iba pang mga areas wherein marami po ang mga kabataan natin o mga batang hindi nagaaral o out of school youth, maliban po dito sa sentro sa mga hinterland. Yun po yung next target natin. Tuloy-tuloy na po ito," dugang pa.
Samtang gipangulohan usab ang maong paglusad sa programa pinaagi ni Police Colonel Henry Dampal, City Director sa Cocpo, nga tumong niini nga mapaduol sa komunidad ang kapulisan ug matabangan ang mga kabataan nga mga anaa sa ubos nga estado sa kinabuhi nga makakat-on ug labaw sa tanan maiway diha sa mga dautang impluwensiya ug sayop nga mga prinsipyo.
"Kini among ginahimo mao lamang nga mahimong kabahin ug mahimong instrumento nga maka reach out pud sa atong kabatan-onan nga dili sila malambigit sa mga krimen or mahimong biktima pud sa mga krimen," matud ni Dampal.
Gidugang pa nga mentras bata pa, usab matudloan ug malikayan ang pagkabiktima diha sa sayop nga ideolihiya.
Nasayran nga kapin gatos ka mga bata ang nahatagan sa kahigayonan nga malingaw pinaagi sa pag-drawing, pag-kolor ug uban pa.
Nabusog usab sa gitunol sa kapulisan ang mga kabataan sa mga miryenda sama sa mga biskwit, ice cream ug uban pa nga lakip gitunol sa mga otoridad.
Nasayran nga ang mga libro alang sa mobile library nagagikan kini sa mga pribadong indibidwal, grupo, organisasyon ug uban pa nga gi-donar isip suporta tungod kay nalipay sa maong programa sa kapulisan.
Kahinumdoman nga gilusad na usab ang susama nga programa sa siyudad sa Iligan.
Oplan Patisoy
Dili lamang mga pagkaon ug mga pagtudlo sa mga kabataan ang gitanyag sa kapulisan atol sa paglusad sa mobile library tungod kay nagtanyag usab sila og libreng alot.
Gilusad usab sa mga otoridad ang Oplan Patisoy nga gikalipay sa mga kabataan ug mga ginikanan.
Gibutyag ni Sonido nga gipakita sa kapulisan ang ilang mga kahibalo ug talento pinaagi og pagtanyag og libreng serbisyo.
"Sino-showcase kasi natin dito yung mga talento ng ating kapulisan ng hindi lang po sila naka focus sa pangpulis na trabaho, kundi it's time to give services dito sa ating community gaya po ng pulis natin na marunong manggupit so nagbibigay tayo ng libreng gupit," matud ni Sonido.
Samtang mapasalamaton usab pag-ayo ang usa ka inahan nga si Leny Montero, 44, ug residente sa maong dapit tungod kay nalibre na ang anak diha sa pagpaalot.
"Dako gyud katabang kay nalibre akong anak og alot ang bayad karon kay tag P40 naman. Nalipay gyud ko," matud ni Montero.
Samtang nalipay usab ang 10 anyos nga batang lalaki kinsa lakip sa nakapahimulos sa maong gilusad nga Opla Patisoy.
"Nalipay ko, nindot na akong alot kay ikatulo pa nako ni karon pagpaalot," matud niini.
Ubay-ubay ka mga bata usab ang nakapaalot atol sa maong programa.