NAHULOG na sa mga kamot sa otoridad ang magtiayon kinsa iladong tigpangawat og motorsiklo base na usab sa mga kuha sa closed-circuit Television (CCTV) camera sa nagkadaiyang dapit sa siyudad sa Cagayan de Oro.
Sikop sila si Naira Buat alyas Nairah Laguindab, 27, taga Pantar, Lanao del Sur; ug Junaid Macabuat alyas Junaid Abas, 33, minyo nga dunay duha ka managlahing address sama sa Pantar, Lanao del Sur ug MB Maranat, Bontalis, Lanao del Sur kinsa giingong membro sa Moro Islamic Liberation Front (MILF) base sa ilang mga ID.
Sa pakighinabi kang Police Major Zean Paul Cubil, gibutyag nga ilado ang mga suspetsado ug anaa na sa sobra napulo ka mga motorsiklo ang nakawat.
Gikabutyag nga istilo niini nga magsandig-sandig ug molingkod si Buat sa motorsiklo kinsa magdala og payong aron matabunan ang yabehanan sa motor.
Giingong moduol si Macabuat aron maoy molugit sa yabehanan ug kung moandar na moangkas dayon si Buat.
Gidugang pa nga tanan nga nakawat nga motorsiklo dalhon sa mga nagkadaiyang dapit sama sa Cotabato City, Tacorong, Bukidnon, Lanao del Norte, ug Marawi.
"Pag nakuha yung motor mo, mahirapan ka talaga. Maraming ma so-solved dahil sa pagkahuli ng big time na carnapper na ito. Maraming ebedensiya laban sa kanila," dugang pa.
Giingong ubay-ubay ka mga CCTV ang susamang istilo ug deskripsiyon sa mga suspek kinsa dunay nahitabong pagpangawat sama sa Divisoria, Carmen, Cugman, Agora, Cogon ug ubang dapit.
Nasayran nga nasikop sa joint entrapment operation sa kapulisan sa Police Station 2 (PS2) sa Cogon kauban ang elemento sa Police Station 5 (PS5) sa Macabalan, ning siyudad ang mga suspek.
Gikabutyag nga nagpakitabang sa kapulisan ang biktima nga si Hassim, 30, taga Barangay Camaman-an, ning siyudad, human gikawat ang iyang motorsiklo mga alas 7:00 sa gabii niadtong Nobyimbre 10, samtang nakaparada sa Guillermo Yacapin Street, Barangay 33, ning siyudad.
Giingong nakigtransaksiyon ang mga suspetsado ngadto sa biktima kinsa nagpatoong dunay utang nga P30,000.
"Kinagat nila na kunwari may utang talaga yung biktima babayaran, nilaro na mayrong utang. From there, ginamit nila yung sim card. Pagka-transact nila ng pera, na-verify namin na sila talaga ang nag-carnap kasi paano man nila nakuha ang cellphone kung wala silang alam," matud ni Cubil.
"Mga hindi lang higit sa 10 siguro, marami na kasi notorious talaga to sila ilang taon na silang gumagala. Na-timing lang ngayon," dugang pa.
Nakuha gikan sa sakyanan nga gisakyanan sa magtiayon ang P10,000 nga gigamit sa entrapment operation.
Gisusi pa usab ang posibilidad nga kinawat usab kining sakyanan nga Vios nga dunay plaka nga ZLF712 tungod kay wala’y insaktong dokumento nga mapakita sa mga suspek.
Giaghat usab ang mga nabiktima nga nawad-an sa ilang mga motorsiklo nga modangop sa ilang buhatan aron masusi kung kini ang mga suspek ang naghimo sa ingon aron mapasakaan og dugang kaso.