SUPERBALITA CAGAYAN DE ORO

Mikilaw og utok sa babaye napatay

CAGAYAN DE ORO. Gideklara nga dead in arrival sa Jasaan Community Hospital si Lloyd Bagtong human giingong nangilog og pusil hinungdan nga napusilan sa polis. (Hulagway kuha ni Zyra Claire)

NANGILOG og armas sa pulis hinungdan nga napusilan ang kontrobersyal nga lalaki nga mikilaw og utok sa babaye sa Punta Santiago, lungsod sa Talisayan, Misamis Oriental, niadtong Biyernes sa gabii, Disyembre 6.

Dead on arrival si Lloyd Bagtong, 21, taga Barangay Casibole, susamang lungsod, pag-abot sa Jasaan Community Hospital human napusilan dihang misulay og ilog sa pusil sa mi-escort nga mga pulis.

Si Bagtong ang gitumbok nga responsable pagputol sa ulo sa wala pa maila nga babaye ug pagkaon sa utok niini.

Sa imbestigasyon sa Jasaan Police Station nga gi pangulohan ni Police Major Dennis Delos Santos, nasuta nga gikan sa inquest proceedings sa Provincial Prosecutors Office si Bagtong.

Pabalik na sa lungsod sa Talisayan mga alas 7:40 sa gabii, dihang na-flat ang ligid sa patrol car.

Samtang anaa sa Puntagorda nga bahin nihangyo si Bagtong nga mangihi.

Gipaatubang sa pulis ang posas niini apan kalit nga nakailog og pusil, apan ang kaubang pulis abtik nga nakabantay ug diretso kining gipusil makaupat ka higayon.

Tungod sa kalisod nabuang

Gituohang tungod sa kalisod ug kakulang sa pagkaon hinungdan nga 16 anyos pa si Bagtong namatikdan nga adunay deperensya sa pangutok.

Si Barangay Casibole Kapitan Ronnie Obejero misulti sa SunStar Superbalita nga trabahante niya si Bagtong isip manakaay og lubi.

Gani, kanunay niya kini gipakaon apan niadtong higayona gipainom sa tag-iya nga misugo niini pagpasaka og lubi.

"Ako pakan-on kuna siya pirme ug dili gyud paimnon kay galahi gyud dayon iyang hunahuna," matud ni Obejero.

Dugang niini, ikaduha si Bagtong sa daghang magsuon ug naminyo sa lain ang amahan niini nga kanunay anaa na sa bukid nga nagtikad og mais uban ang iyang pamilya ug mga anak.

Gikahadlokan sab kini siya tungod sa isog nga tinan-awan ug magsige’g dala-dala og sundang.

Namatikdan ang pagsugod og kadaot sa utok niini 16 anyos pa ang pangidaron human iyang gisunog ang ilang balay ug gilakip ang payag nga gipanag-iyahan ni Obejero.

Gawas niini, iyang gidugmok ang rebolto sa simbahan ni St. Nicholas kay giingon niining "gold" ang utok niini.

Gumikan niini, gigapos kini ni kapitan sa tiil sa kabalaka nga basin makapasakit sa mga tawo sa barangay ug hatdan og pagkaon. Kung makatugbong sab ang amahan niini ug mga igsuon, bilinan og pagkaon sa balay niini.

Dihang adunay programa ang Provincial Government nga mag-inject og dunay deperensya nagpatabang ang kapitan sa amahan niini.

"Giadto ko sa bukid sa iyang papa kay amo unta tabangan nga madala sakay sa Bambi Kab pero tubag sa iya papa, ‘Dili ko pasalig.’ Mao kini ang higayon wala kini matambalan human mismong amahan di makapasalig sa kahadlok na makabuhi ug makahimo og di maayo.”

Mga duha ka tuig ang nakalabay nakabuhi kini sa kadena ug namatikdan nga normal na ang pangutok ug nibalik sa pagsaka sa lubi.

"Gakahadlokan pod ni siya kay lain tinan awan sa mga babae," matud ni Obejero.

Gani daw si Police Captain Maribeth Ramoga, hepe sa Talisayan Police Station, nakasulti kaniya ug niingon nga ipa-rehab unta kini samtang naa sa ilang kostudya.

Sa pagkapatay niini buot ni Obejero maplastar ang patayng lawas niini ug mahatagan og insakto nga lubong karon panahona.

Sa pagkakaron, gisulti ni Police Captain Maribeth Ramoga sa Talisayan Police Station nga wala pay ni-claim sa lawas sa babaye nga nagpabilin sa Gomez Funeral Homes. Gidudahan nga posibleng latagaw sab kini nga babaye.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph