MINGKULIT og kasaysayan ang Pilipinas sa 30th Southeast Asian Games human naangkon sa host nation ang ika-114 nga gold medals niini kagahapon nga mibuak sa kanhi rekord niini nga naposte 14 na ka mga tuig ang nakalabay.
Mga alas 3:00 sa hapon kagahapon, ang Pilipinas nakahakot na og 114 ka gold medals, 87 ka mga silver ug 91 ka mga bronze nga mibuak sa 113-84-94 medal tally nga naposte sa nasod niadtong 2005 nga gipahigayon sab dinhi.
Niadtong 2005 maoy unang higayon nga nahimong overall champion ang Pilipinas sa matag duha ka mga tuig nga kompetisyon ug segurado na kining masundan ning higayuna.
Basi sa website sa Seag, ang Pilipinas nakatali na og 117-87-96 medal tally mga alas 5:00 sa hapon kagahapon ug gilaumang padayon pa kining mosaka sa pagpadayon sa mga kombati karong adlawa.
Ang bag-ong natad sa paugnat sa kusog nga nadugang sa Seag ning higayuna nga mao ang arnis ug dancesports dako og natampo sa kalampusan sa Pilipinas.
Ang duha ka natad sa paugnat sa kusog nakatampo og 24 ka gold medals alang sa Pilipinas.
Komportable na man tuod kaayo nga naglabaw ang Pilipinas sa medal standing apan lahi ang senaryo sa nagsunod nga puwesto gumikan kay nagsikit ang Vietnam ug Indonesia.
Ang Vietnam adunay 68-63-79 medal tally samtang ang Indonesia adunay 66-65-82 haul.
Aduna pa sab poruhan ang Thailand nga makailog og luna sa top three. Naghupot sila og 63-79-84 output.
Sa laing bahin, si Rubilyn Amit mao ang labing ulahing atleta gikan sa Sugbo nga nakadugang og gold medal alang sa Pilipinas.
Gilupig ni Amit ang kababayang si Chezka Centeno, 7-3, aron angkunon ang gold medal sa women’s 9-ball billiard niadtong Dominggo sa gabii sa Manila Hotel Tent.
Nakadaog sab og gold medal ang Pilipinas sa bag-ong gilakip nga event sa kompetisyon nga mao ang esports.
Ang Mobile Legends: Bang Bang team sa Pilipinas milupig sa kaparang niini gikan sa Indonesia sa gold medal game, 3-2.
Nikawat sab og dakong atensyon ang Philippine men’s volleyball team human gipalagpot niini ang defending champion ug labing gikahadlukang puwersa sa Thailand sa semi-finals.
Mao kini ang labing unang higayon nga nakabalik sa finals ang Philippine men’s volleyball team gikan niadtong 1977.
Ang kompetisyon, nga gikombatihan og 11 ka mga nasod, opisyal nga motiklop ugmang adlawa sa New Clark Athletic Stadium sa Capas, Tarlac. (RSC, ESL)