NING upat pa lang gani ka adlaw sa dili pa motak-op ang 30th Edition sa Southeast Asian Games, tin-aw pa sa bolang kristal nga masakmit sa Pilipinas ang overall champion sa matag duha ka tuig nga kompetisyon.
Matuman gyud ang mga sayong panagna sa atong mga sports leaders nga mopatigbabaw ang atong mga atleta, taliwala sa daghang kontrobersiya nga mihapak sa palibot.
Apan gawas sa impresibong labok sa Pilipinas, nakakuha og atensiyon kadtong gihimo sa Filipino surfer nga si Roger Casugay kinsa mas gipalabi pa ang pagluwas sa iyang kaatbang nga Indonesian nga si Arip Nurhidayat atol sa ilang panagtigi sa men’s longboard open competition.
Nabantayan ni Casugay nga daw namilegro ang kinabuhi ni Arip sa dihang gipadpad kini sa dagkong balod nga wala na magsakay sa iyang surfboard.
Bisan pa man og ang sitwasyon nakahatag kaniya og dakong bintaha nga malangkat ang gold medal, apan mas gipalabi pa niya nga luwason ang Indonesian surfer.
Iyang gipatugbabaw ang kasingkasing sa usa ka atleta nga adunay bulawanong kasingkasing, ang atleta nga mitamod sa tinud-anay nga katuyoan sa sports ug labaw sa tanan, atleta nga adunay malumong pagbati sa iyang isig kaingon nga di magtan-aw kon unsa ang nasyonalidad.
Kini tungod kay siya sayod kon unsa ka lisod ug sakripisyo sa usa ka atleta aron morepresenta ug makahatag og dungog sa nasod.
Sobra pa sa gold medal ang gipakita ni Casugay. Dakong garbo ug dungog sa nasod.
Pero aniay coach sa atong karate nga giingong daw og sa mibiay-biay man hinuon sa atong atleta nga naka gold.
Ang Fil-Japanese nga si Junna Tsukii, pinaagi sa social media, mipadayag sa iyang kahiubos ug kasagmuyo tungod kay giingnan siya sa iyang coach nga wa siyay labot sa team.
Sukwahi sa uban mananaog, si Tsuki, gold medalist sa women’s kumite karate competition, matod pa, giisnab sa coach nga wa niya hinganli.
“Now I’m very sad, even (if) I have (a) gold medal,” ni Tsuki pa sa iyang post sa social media.
Gitug-an niya nga sa ilang meeting, gitawag ang mga pangalan sa tanang mga atleta ug gi-congratulates, apan wa gyud siya malakip sa mga gitawag ug wa gani siya atubanga sa coach.
Iyang gibutyag nga dili lang kadto maoy unang higayon nga gihimo kini sa coach sukad sa iyang paghibalik gikan nisalmot sa torneyo didto sa Madrid, Spain.
“I couldn’t stand being bullied in front of everyone at a team meeting, so I asked head coach that ‘Why you didn’t call my name? And he said ‘Because you are not part of the team, that’s why your medal is not for this team or not for this country. And for me you are dead, that’s why I can’t see you because you are dead’ [sic],” dugang ni Tsukii sa iyang post.
Pastilan. Wa man tuod pa ta kahibawo kon unsay hinungdan nga morag grabi og kasuko si coach, pero mora man og siyay nakapanag-iya sa team ug sa nasod.
Wa niya tan-awa ang kahago sa atleta ug ingon man ang dungog nga natampo ni Tsukii.
Maayo kaha ni? Gold medalist unya biay-biayon? I-bully? I declare pa nga dili kuno para sa Pilipinas ang gold medal ni Tsukii.
Kadakong salikwaot. Kon si Casugay naluoy sa Indonesian surfer nga dili gani kadugo niya, ania hinuoy Pinoy coach nga gustong modaot ug magpakauwaw sa kaugalingong sa atleta.
Ang nahitabo ni Tsukii tipik sa nagpadayon nga kaguliyang sa Karate Pilipinas Inc. (KPI).
Kon kahinumdoman, nitiyabaw sab si James de los Santos, usa ka inilang karatesta, kinsa gitangtangang og slot, lima ka adlaw sa wala pa sugdi ang SEA Games, aron pag-accomodate sa usa ka junior athlete nga giingong anak sa usa ka executive sa federation.
Hinaot nga dili lang ni palabyon sa dawonggan sa Philippine Sports Commission (PSC). Himoan unta gilayon ni nila og imbestigasyon. (jun.migallen22@gmail.com)