MGA duwa karon
6:30 pm - UC vs. USJ-R
8:00 pm. - SWU vs. UV
Championship rematch maoy masaksihan karong gabii sa panag-abot sa bag-ong kampiyon sa Cebu Schools Athletic Foundation, Inc. (Cesafi) Southwestern University-Phinma (SWU) Cobras ug multi-titled University of the Visayas (UV) Green Lancers sa 2019 Minglanilla Mayor’s Cup Inter-collegiate Christmas League sa Minglanilla Sports Complex.
Ang Cobras ni coach Mike Reyes, sa niaging buwan, malampuson nga milangkat sa korona sa Cesafi men’s division human nila mabuntog ang defending champion Lancers sa deciding Game 3 nga sa samang higayon maoy nagputol sa tulo ka tuig nga dominasyon sa UV ubos ni coach Gary Cortes.
Apan ning higayona, ang Lancers, nga maoy defending champions ning usa ka semanang torneyo, dili buot nga mailugan na usab sila sa kampiyonato.
Sa preliminary match, ang University of Cebu (UC) Webmasters makigsangka usab sa USJ-R Jaguars nga sugdan sa alas 6:30 sa gabii.
Ang Webmasters gipaabot nga moparada sa ilang import nga si Tosh Sesay. Niadtong Lunes, Disyembre 9, ang UC ug ang Cobras nagsangka sa main game sa ilang unang tagsatagsa ka mga tahas, samtang nagtakos usab ang UV ug ang University of Southern Philippines Foundation (USPF) Panthers sa preliminary action.
Sa ilang unang duwa, Dominggo, Disyembre 8, ilang gidabodabohan ang University of San Jose Recoletos (USJ-R) Jaguars, 100-86, bisan pa man og 10 ka mga players ang gitugotan sa komite nga makaduwa tungod sa problema sa uniporme.
Si Melvin Butuhan mipabaha og 33 puntos, lakip na niini ang usa ka hansak, aron pangulohan ang kadaugan sa Lancers samtang si Elmer Echavez Jr. mitali og 16 puntos alang sa Jaguars.
Puntos matag usa:
UV (100) - Butohan 33, Tarrosa 14, Saga 13, Taliman 11, Buscay 10, Cabahug 9, Fua 4, Gonzaga 3, Hassan 2.
USJ-R (86) - Echavez 20, Gabutero 11, Pascua 9, Tabio 8, Villabrille 8, Gaviola 6, Mondares 6, Paras 5, Roblez 4, Co 3, Carin 2, Mendoza 2. (JBM)