NAGKASINABOT diri sa opisina sa PRWorks nga si Miss South Africa Zozobini Tunzi ang modaog sa Miss Universe tungod sa iyang tubag nga “leadership.”
“I think the most important thing we should be teaching young girls today is leadership. It’s something that has been lacking in young girls and women for a very long time, not because we don’t want to but because of what society has labelled women to be,” matod pa ni Tunzi.
Kini nahitabo pipila ka minuto sa wala pa opisyal gianunsyo ang nidaog sa Miss Universe 2019.
BItaw, ang Miss Mexico ug Miss Puerto Rico naghisgot man kabahin sa authenticity nga maoy ilang itudlo sa mga batang babaye. Apan lahi si Miss South Africa, iyang gihisgutan ang “leadership” kun liderato.
Angay man gyud nga mobarug alang sa liderato ang mga babaye karon. Ug nindot kaayo nga mao kini gihisgutan ni Miss South Africa.
Palahi sab gyud siya kay itom iyang panit.
Si Miss Philippines Gazini Ganados? Diha siya naapil sa top 20 isip wild card. Apan wala na siya maapil sa top 10. Lisud man sab gyud kining back-to-back victories alang sa Pilipinas. Lisud sab gyud sundon si outgoing Miss Universe Catriona Gray.
Congratulations, Miss South Africa! Congratulations Miss Universe!
Junquera
Ipasalida karong alas 4 sa hapon sa Lunes, Disyembre 16, 2019 ang interbyu nilang Dr. Resil Mojares ug Dr. Jobers Bersales kabahin ni Gen. Junquera Street nga nahimong red light district sa sayo sa 1900s.
Basi sa akong nahibaw-an, tungod kini kay naduol man gud ang maong dapit sa terminal sa tren niadtong panahona. Nitumaw ang daghang mga baylehan ug nagdugok ang daghang mga babaye nga mugbog lupad.
Bisan pa man sa paninguha sa Barangay Kamagayan nga mawala ang mga casa sa maong barangay, padayong negatibo ang imahen niini nga naa sa dalan Junquera.
Mao nga naninguha karon ang Palm Grass Hotel nga masabtan ang kontribusyon ni Gen. Inocensio Junquera sa atong kasaysayan isip gobernador kaniadtong 1893-95 ug ang iyang pagtukod sa Teatro Junquera nga nailhan na karon nga Cine Oriente.
Dako ang iyang nahimo isip pagduso sa theater dinhi sa Sugbo.
Ang video interviews nilang national artist Dr. Mojares ug social historian Bersales ipasalida karong Lunes isip ika-124 nga sumad sa unang dula nga gipasalida sa Teatro Junquera karong Disyembre 16, 2019 diha sa Palm Grass Hotel.
Ang video hinimo ni Prospero Laput nga nagbase sa Hong Kong ug duna kiniy gamayng pakigpulong ni Gavin Sanson Bagares, usa ka heritage writer. (@anol_cebu sa Twitter)