SUPERBALITA CEBU

Espinoza: ‘No to tax’ ang singgit sa koop

Nagpakabana

GRABE. Niadtong gabii sa Dominggo, Disyembre 8, alas 9:30 ang trapiko gikan sa Ayala flyover padung ngadto sa nagsunod nga flyover nag-aginod. Hunahunaa nga sa kamubo sa maong distansya niabot og duolan usa ka oras una ko nakatabok sa ikaduha nga flyover.

Moingon ta nga di na ikahibung ang hinay nga dagan sa trapiko sa dakbayan sa Sugbo tungod kay nagkadaghan ang mga tawo ug mga sakyanan. Apan sa gabii sa Dominggo angay gyud ta nga mahingangha.

Akong gitawgan sa telepono ang Citom aron unta pagsuta kon naa bay aksidente sa unahan apan walay nitubag sa akong tawag. Ato ba nga sabton nga sa gabii sa Dominggo wala nay moatiman sa atong trapiko gawas kon adunay mga VIP nga moabot? Makasabot ta nga atol sa weekend ang kadaghanan nato nagpahuway. Apan sa gobiyerno labina sa pulis ang ilang serbisyo 24/7 bisan dunay silay adlaw nga tingpahuway.

Si retirado Police Col. Andres Bayarcal, nga akong classmate sa college, ang kasamtangan nga hepe sa Citom, naningkamot nga mahapsay ang dagan sa trapiko apan igo ra siya nga mopatuman sa balaod ug lagda sa trapiko. Ang usa ka dako nga problema mao ang disiplina sa mga drayber.

Walay bangga niadtong gabii sa Dominggo. Ang hinungdan kay ang mga drayber nga way disiplina nagpaugat nga mosuksuk sa linya sa mga sakyanan nga mosaka sa flyover.

•••

NO TO TAX. Kapin sa 600 ka mga sakop sa nagkalainlain nga kooperatiba sa nasud ang mitambong kagahapon sa usa ka adlaw nga National Summit of Cooperatives nga gipahigayon sa Waterfront Hotel, dakbayan sa Sugbo aron pagsupak sa lakang sa BIR nga kolektahan og buhis ang mga kooperatiba.

Ang mga kooperatiba basi sa Articles 60, 61, RA 9520 libre sa buhis o dili makolektahan og buhis. Ang usa sa mga katuyoan sa kooperatiba mao “ang pagpundo ug pautang sa mga sakop aron mahimo nga mabungahon ug mapuslanon” (par. (2) Art. 6, RA 9520).

Ang katuyoan sa kooperatiba mao ang pagtabang sa mga sakop sa ilang mga pakinahanglan. Mao nga kon kolektahan ang mga kooperatiba ang maapektohan mao ang mga sakop nga kapin na sa 11milyunes sa entero nasud.

Si Usec. Orlando R. Ravanera, chairman sa Cooperative Development Authority (CDA), sa iyang pakigpung supak siya nga kolektahan og buhis ang mga kooperatiba. Gani, misaad siya nga mobiya siya sa CDA kon kolektahan og buhis ang mga kopertiba.

Si kanhi Cong/Gov. Pabling Garcia sa iyang pakigpung naghisgut sa mga balaod ug probisyon sa Batakang Balaod nga naghatag og exemption sa buhis sa mga kooperatiba. Giawhag ni Garcia ang CDA sa pagprotehir sa interes sa mga coop samtang si Gob. Gwen ang mihatag og mensahi sa pag-abli sa coop summit.

Ang singgit sa mga sakop sa kooperatiba “NO TO TAX”.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph