PAGKA-maayong tawo gyud ni Mayor Edgardo Labella. Kay kon siya ang pabut-on, gusto man niyang ipa-deklarar nga himuong holiday ang December 4 nga mao ang adlaw’ng natawhan ni Sergio “Serging” Osmeña Jr., ang amahan nila ni Tomas, Minnie, Georgia ug kanhi senador Sergio “Serge” Osmeña III. Niadtong Dec. 4 mao ang ika-103 nga adlaw’ng natawhan ni Serging.
Gi-anunsiyo ni Labella nga kon puwedeng himuon nga holiday ang maong adlaw sa dakbayan sa Sugbo in honor ni Serging. Matod pa ni Labella nga iyang hangyuon sila si Kongresista Raul del Mar ug Bebot Abellanosa nga mangamahan og balaod aron madeklarar nga holiday ang maong adlaw dinhi sa dakbayan sa Sugbo. Ang Kongreso lang pinaagi sa balaod o pinaagi sa executive order sa Presidente makadeklarar nga special non-working/working holiday ang usa ka adlaw sa usa ka lugar.
Matod pang Labella nga angay lamang nga hatagan og holiday si Serging kay dako siyag natampo sa kalambuan sa Cebu labi pa sa natad sa imprastraktura. Sama sa North Reclamation Area, ang unang taytayan nga nagdugtong sa mainland Cebu ug Mactan ug ang pagpabalhin sa airport sa Lapu-Lapu City kay gamay ra ang airport sa Lahug.
Tiaw nimo na nga amahan sa iyang kontra gustong pasidunggan ni Labella? Pagka-maayonga tawo. Sus, wala man gani maghikutar ang mga anak, si Labella na ba hinuon. Si Tomas nahimong mayor sa dakbayan sa Sugbo ug inpluwensiyado sa mga magbabalaod. Nahimong senador si Serge sulod sa taas-taas nga panahon. Wala man gani sila maghikutar. Ila na unta kining gihimoan og lakang sa ilang panahon.
Ang National Historical Commission of the Philippines way klarong lagda sa paghatag og pasidungog labi pa ang pagdeklarar og special day sa usa ka tawo o personalidad nga nakatampu og dako sa lugar nga diin siya magpuyo o mo-alagad. Alang kanako kon adunay angay nga hatagan og special holiday dinhi sa Sugbo mao sila si kanhi Senate President ug Supreme Court chief Justice Marcelo Fernan ug Don Vicente Rama kay mas dako og nahimong kaaayuhan ug kalambuan sa Sugbo kay ni Serging. (bobbygnalzaro@gmail.com)