SUPERBALITA CEBU

Aksyon batok climate change

DI IBALIWA. Si Kisha Erah Muaña, founder sa grupong Step Philippines, usa sa pito ka mga panelist atol sa press conference Lunes, Disyembre 9, 2019, kabahin sa United Nations Climate Change Conference (COP25) nga gipahigayon karon sa Madrid, Spain. (Screenshot gikan sa UNFCCC live video)

MADRID, Spain--Aksyon. Kini maoy panawagan sa 23 anyos nga Cebuanang climate activist ngadto sa lokal nga mga lider sa dakbayan ug lalawigan sa Sugbo kalabot sa problema sa nasinating climate change.

Si Kisha Erah Muaña, founder sa grupong Step Philippines, nagkanayon nga di angay ibaliwala sa mga lider ang problema kalabot sa climate change.

Si Muaña maoy bugtong youth leader nga representante sa Pilipinas sa kasamtangang United Nations (UN) Climate Change Conference kon mas nailhan nga COP25 (Conference of Parties) nga gipahigayon sa Madrid.

Matod ni Muaña, di angay ibaliwala sa mga lider ug di ilangay ang mga lakang niini sa pagbatok sa maong problema.

"To the local government in Cebu I am here, I am willing to help with you and coordinate with you for the implementation of climate action," matod ni Muaña sa interview sa Superbalita Cebu Lunes, Disyembre 9, 2019.

Dugang niya, isip usa sa mga aktibong climate activist, ang buot niya makita ang aksyon sanglit dugay naman nga gideklara ang climate emergency sa tibuok kalibutan.

Si Muaña usa sa pito ka mga panelist uban sa nabantog nga climate activist Greta Thunberg atol sa nahitabong press conference Lunes sa buntag , Disyembre 9, sud sa venue sa COP25.

Kuyog niya ang ubang youth climate champions sa nagkadaiyang dapit sa kalibutan nga sila si Angela Valenzuela sa Chile; Arshak Makichyan sa Russia; Carlin Zackras sa Marshall Islands; Nakabuye Hilda Flavia sa Uganda; ug Rose Whipple, Dakota, USA.

Sa iyang speech iyang gibida ang "ocean emergency ug climate action" sa nasud.

"The Philippines has been making legislative measures in response to climate change which is a really good foundation. However, real time, robust, and lasting action is needed," tipik sa speech ni Muaña.

Nanawagan siya sa iyang speech og aksyon sa mga global leaders sanglit apektado man sa climate change ang "kinabuhi ug pagpakabuhi."

"This is supposed to be a blue COP, walk the talk and make it blue as possible. Every second is a time for action and we are here because we are action," padayag ni Muaña.

Nalipay ug nasagmuyo

Gitataw ni Muaña nga nalipay siya nga maoy nirepresentar sa nasud sa dakong kalihukan sanglit mas gipaminaw iyang tingog sa maong conference.

"Lahi ang feeling nga diri gipaminaw ko sa COP25 but sa akong kaugalingong country dili kaayo, wala kaayoy support. Na-happy ko sa COP nga ilang gidungog ang mga tingog sa youth," matod ni Muaña.

Wala ug tuo ang interview ni Muaña sa mga international press kagahapon ug nagsilbi sab siya nga panelist sa ubang mga kalihukan sa conference.

Gawas sa pagrepresentar sa iyang grupo ug sa nasud, coordinator usab si Muaña sa Youth Strike for Climate Philippines nga konektado sa grupo ni Thunberg.

Nahibung usab si Muaña nganong walay delegasyon ang Pilipinas sa conference nga usa man unta kini sa mga nasud nga daling maapektahan sa climate change.

Ang grupo ni Muaña nga Step Philippines usa ka youth non-profit organization nga gilangkuban sa mga volunteers, young leaders, researchers, aspiring environmentalist ug conservationist. Ilang gitutokan ang isyu sa ocean conservation, citizen science ug climate action. (JPP)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph