ARON makatubag gilayon sa communication gap atol sa mga katalagman kon mapawong ang mga signal, ang Department of Information, Communications and Technology (DICT) Visayas cluster molusad sa ilang Government Emergency Communications System-Mobile Operations Vehicle for Emergency (GECS-MOVE) sa Sugbo.
Dako og tabang kining GECS-MOVE panahon sa mga katalagman kay kon di man gani mapawong ang signal, sagad bahaan kini sa mga tawag ug text nga makaapekto sa komunikasyon.
Nahitabo ni niadtong dunay tsunami scare sa Cebu niadtong 2013.
Isip usa sa mga nasod sa kalibutan nga daling maigo og mga katalagman, ang komunikasyon importante ug gikinahanglan, di lang sa matag usa ka tawo nga buot masayod sa nahitabo sa ilang mga kabanay, kon di unsa nay nahitabo sa usa ka dapit, ang gikinahanglan nga aksyon nga pagahimuon.
Matag human sa usa ka katalagman, sama sa linog ug bagyo, gikinahanglan usab sa kagamhanan ang kasayuran sa kahimtang sa dapit aron makaandam og unsay angay nga buhaton, unsa nga response ang gikinahanglan ug unsa ang panginahanglan.
Sud sa dugay nang panahon, ang suliran sa komunikasyon matag dunay katalagman dako kaayong suliran sa dapit sa nasod nga naigo niini. Kay dunay mga katalagman sama sa baha ug bagyo nga motumba sa tanang mga imprastraktura, lakip na sa komunikasyon.
Hinaut pa nga kining mao nga mga ekipo padaghanon pa sa kagamhanan tungod kay sa umaabot nga katuigan, gipaabot nga daghan nang mga katalagman nga mahitabo tungod sa global warming. Sud na sa dugay nga panahon, kining panginahanglan sa komunikasyon nataligam-an sa kagamhanan.