GITUOHANG love triangle ang motibo pagpatay sa usa ka 18 anyos nga lalaki atol sa kasaulogan sa kapistahan sa Barangay Basak, Lantapan, Bukidnon mga alas 5:30 sa kadlawon duol sa Basac Elementary School.
Nagbuy-od nga wala nay kinabuhi si Junrey Anghel Gawingan, 18, usa ka tinun-an.
Si Police Major Noel Cano, hepe sa Lantapan, Bukidnon nibutyag sa SunStar Superbalita nga aduna na sila'y natumbok nga suspetsado apan dili pa nila kini manganlan labina gipangita pa karon panahona.
Gituohang karibal niini sa babaye ang responsable tungod kay kining batan-on wala'y laing kaaway o mga hulga nga nadawat.
Ilang nasayran nga ang biktima adunay uyab nga babaye ug ang babaye aduna sab diay laing lalaki nga uyab.
Uwahing nakita kining babaye nga kuyog kining biktima niadtong tungora ug anaa sab ang laing uyab sa babaye.
Ang suspek padayon pa gipangita sa kapolisan lakip ang babaye nga wala na usab makita human sa pagpamusil.