PATAY ang usa ka lalaki human gipusil sa bayaw samtang mangayo unta og pasaylo mga alas 12:20 sa tungang gabii niadtong Dominggo, Disyembre 8, sa Zone 8, Upper Bulua, sa siyudad sa Cagayan de Oro.
Giila ang biktima nga mao si Jhon Recania, 50, minyo, residente sa dapit, samtang ang suspetsado nga bayaw nailang si Leopoldo Paclar.
Sa inisyal nga imbestigasiyon sa kapulisan sa Police Station 7 (PS7) sa Bulua, gikabutyag nga nagkalalis ang biktima ug suspek samtang nag-inom.
Giingong mangayo unta og pasaylo si Recania apan kalit kining gipusil sa bayaw gamit ang wala masutang armas, apan gituohang kalibre .45 tungod na usab sa nakuhang ebedensiya sa nahitabong dapit.
Samtang gibutyag sa kaipon ni Recania nga susama nga nagdumot ang iyang bayaw tungod kay ang iyang kaipon dunay lain.
Nakuha sa crime scene ang duha ka fired cartridge sa gituohang kalibre .45 nga armas pinaagi na usab sa Scene of the Crime Operatives sa pagpangulo ni Police Lieutenant Romeo Adlaon.
Sa pagsulat niini nga balita, ang maong suspek ang padayong gawasnon karong panahona.