HANGTUD sa pagsulat ning balita, wala pa maila ang usa ka lalaki nga midabdab sa iyang kaugalingon niadtong Sabado, Disyembre 7, mga alas 2:00 sa hapon sa Velez street, Rotonda, Barangay Macasandig, sa siyudad sa Cagayan de Oro.
Base sa mga unang nakakita, ang maong lalaki nagkalo og itom ug nagbutang og tuwalya nga puti sa iyang liog.
Sa pakighinabi kang Alexander Vergara, 35, minyo ug residente sa Upper 20th St. Nazareth, kinsa nakakita sa maong panghitabo, gibutyag niini nga nakitang dunay gibitbit nga galon ang lalaki ug gituohang gibubo sa iyang kaugalingon dayong kadlit sa lighter rason sa pagdilaab sa lawas niini.
Gisulayan pa kini sa pagpalong gamit ang fire extinguisher sa nagpakabanang katawhan, apan wala na madala ug nakabsan gyud sa kinabuhi ang lalaki.
"Basa na iyang lawas. Dayon naa siya'y gigunitan nga gallon, dayon naa siya'y gikuot sa iyang bulsa. Lighter iyang gikudlit sa iyang likod, hikog gyud," matud ni Vergara.
Gibutyag usab ni Police Major Ericson Sabanal, hepe sa Police Station 9 (PS9) sa Masandig, nga wala pa naila ang maong lalaki.
Nasayran nga sa nakuhang video sa usa ka netizen, nakitang nagdilaab pa ang lawas sa nahisgutang biktima.
Sa pagsulat niini nga balita, ang patay nga lawas ang nagpabilin pa sa Bollozos Funeral Homes sa Bulua, ning siyudad.