SANGKO sa langit ang kasuko sa usa ka Australian national nga nidangop sa Abellana Police Station kuyog sa manager sa hotel nga iyang gisak-an human gisibat ang iyang kwarta nga iyang gihipusan sulod sa iyang vault sulod sa kwarto.
Si Police Major Elizandro Quijano, hepe sa Abellana Police, niingon nga pasado ala 1, Dominggo sa hapon na nireklamo ang langyaw nga giilang si Michael Jame Eade, 49.
Siya kasamtangan nga nagsaka sa usa ka hotel sa eskina dan Apitong, Barangay Kamputhaw.
Mga ngan sa mga suspek gipugngan ning mantalaan samtang wa pay kasong napasaka.
Sa iyang reklamo sa Abellana Police, nga samtang nag lingaw-lingaw siya sa usa ka bar sa Mango Avenue, duha ka mga babaye naila-ila ni Eade. Gituohan nga usa niini maoy bugaw.
Nag-inom silang tulo hangtud nga niimbetar ang langyaw sa usa ka babaye nga gikuyogan sa laing babaye.
Ang mga suspek nailhan sa ilang mga ngalan subay sa identification (ID) card nga gipakita nga sila si Marites (di tinuod nga ngan), lumolupyo sa Barangay Lorega San Miguel ug Janes (di tinuod nga ngan), kasamtangan nga nagpuyo sa dan Espolarium, Barangay Duljo Fatima, siyudad sa Sugbo.
Matod ni Eade nga pag abot sa iyang kwarto, nihigda sa makadiyot aron mopahuway una apan wa siya magtuo nga siya makatulog og pipila ka oras.
Sa iyang pagmata pasado alas 9 sa Dominggo sa buntag, wala na ang duha ka mga babaye.
Una niyang gisusi ang iyang mga kahimanan apan way nawala. Sa iyang pagsusi sa iyang vault, wa na ang iyang 900 Euro.
Gisubay sa kapulisan ang dapit kon asa makita ang duha ka mga kawatan uban ang langyaw apan pakyas.
Gidugang sa langyaw nga gisulti ngadto na sa mga pulis nga wa siya nakapahimulos sa babaye nga iyang nahimamat ug gidala ngadto na sa iyang lawak kay siya nakatulog.
Kasong pagpangawat ang atubangon sa duha ka mga suspek kon ikiha. (BBT)