GIPATAS-AN sa Sinulog Foundation Inc. ug Cebu City Sinulog Governing Board ang madawat nga ayuda sa mga partisipante sa umaabot nga Sinulog Grand Parade nga maoy halad sa kapistahan ni Snr. Sto. Niño.
Si Elmer “Jojo” Labella, executive director sa SFI, nagkanayon nga nasabotan sa SFI ug CCSGB nga dugangan og P100,000 ang ayuda hinungdan nga gikan sa P400,000 sa 2019, mahimo na kining P500,000 sa 2020 ubos sa pagtugot ni Mayor Edgardo Labella.
“The SFI and the Sinulog Governing Board and the mayor himself agreed to raise the subsidy from P400,000 to P500,000 per participant,” padayag ni Jojo, igsuon sa mayor.
Siya niingon nga nimahal na ang materials nga gigamit sa pasundayag ug way ayuda gikan sa barangay.
Gumikan niini, makabenepisyo ang 10 ka mga barangay sa dakbayan ug lima ka mga lungsod ug siyudad nga sakop sa lalawigan sa Sugbo.
Kini gilangkuban sa Barangay Guadalupe, Basak San Nicolas, Labangon, Cambinocot, Budlaan/Pulangbato, San Nicolas, Sapangdaku, Mabolo, San Nicolas Proper ug Inayawan, sakop sa Cebu City.
Samtang ang Carcar City, Talisay City, Ginatilan, Bogo City ug Lapu-Lapu City sa lalawigan sa Sugbo, pulos moapil sa Tribu sa Kabataan, ang kanhi Sinulog sa Kabataan sa Dakbayan ug Lalawigan.
Gikan sa P500,000 sa 2019, mahimo na kining P600,000 sa 2020. Ang Toledo City sa grand parade na lang moapil busa P250,000 ra ang ilang madawat.
Ang executive director sa SFI nipasabot nga wa na nila gitawag og Sinulog sa Kabataan sa Dakbayan ug Lalawigan ang preliminary nga mga pasundayag gumikan usab sa pag-backout sa Department of Education (DepEd) nga moapil sa Sinulog.
Kini gumikan sa uwahi nga pahibawo diin kaniadto, ang mga ngalan sa eskwelahan ang ilang gigamit. (PAC)