GIPASIRAD-AN sa kagamhanan sa dakbayan sa Lapu-Lapu ang usa ka piggery ug poultry farms sa managlahing barangay sa dakbayan kagahapon, Lunes, Disyembre 9.
Kini gumikan kay pulos kini nag-operate nga walay business permit gikan sa kagamhanan sa dakbayan.
Gawas pa niini pulos usab kini nakalapas sa ordinance No. 484-97 kun Comprehensive Environmental Sanitation Code of Lapu-Lapu City gumikan sa kabaho.
Nahimutang kini sa usa ka residential area nga kalapasan sa ilang Comprehensive Land Use Plan (CLUP).
Nasayran nga kaduha na gipadad-an ang duha ka negosyo ug mga notisya sukad pa niadtong Septiyembre sa paghunong na sa ilang pag-operate.
Ang gipasirad-an mao ang Dolores Egg Poultry sa Sitio Ka Maria, Barangay Mactan nga gipanag-iya ni Ma. Dolores Rivera Osuyos ug ang piggery nga gipanag-iya ni Henry Sta. Teresa sa Pajac Proper, Barangay Pajac.
Matod ni Lapu-Lapu City Mayor Junard “Ahong” Chan nga dugay na siyang nakadawat ug reklamo mahitungod sa pag-operate sa naasoyng piggery ug poultry sa iyang dakbayan hinungdan nga niadtong Septiyembre ug Oktubre iyang gipadad-an og mga notisya sa ilang kalapasan.
Kini base usab sa gipahigayong pakisusi sa City Treasurer’s Office sa kagamhanan.
Apan ala panumbalinga sa mga tag-iya ang mga notisya sa kagamhanan hinungdan nga sa pagbisita ni Chan sa naasoyng piggery ug poultry kagahapon, iyang dayon kini nga gipasirad-an.
Ang poultry ni Osuyos giingong dunay permit sa kagamhanan apan alang lang sa pag-negosyo og itlog ug dili poultry farm.
Samtang ang piggery nga iya ni Sta. Teresa wala gyuy permit sa pagnegosyo og piggery.
Gibutyag ni Chan nga kadaghanan sa mga molupyo duol sa poultry nga sagad mga langyaw nangasakit sama sa asthma gumikan sa kabaho.
Dugang ni Chan, isip resort ug tourist city, dili maayo nga dunay poultry ug piggery sa tungod sa kabaho niini.
Ang dakbayan pulos na residential ug commercial area ug wala nay luna alang sa usa ka agricultural area.
“Ang message nato for those who are doing business with piggery and poultry please stop and mahimo pangita mo lain outside Lapu-Lapu kay di gyud ko mohatag ug permit, wa moy luna sa Lapu-Lapu niana kay wala tay gitugotan ana nga mag-poultry ug piggery diri kay wala natay agri-business diri,” matod ni Chan.
Si Atty James Sayson, OIC city legal officer sa Lapu-Lapu, nibutyag nga dili ra hinuon makaapketo sa supply sa manok sa dakbayan ang pagpasira sa naasoyng poultry sanglit dili man manok ang ilang negosyo kun di itlog.
Samtang ang piggery giingong wala usab mag supply usa mga dagkong establisimento ug kamerkadohan gawas sa mga kaila ug silingan.
“If di nila i-pullout ang ilang mga hayopan ato gyud nga i-padlock ang ilang estbalisemento ug mo-file nami og kaso batok nila,” matod ni Sayson.
Ang mga tag-iyang silang si Osuyos ug Sta.Teresa mipasalig hinuon nga mosunod sa mando sa kagamhanan ug i-pullout ang ilang mga manok ug baboy.
Misuway unta sila ug hangyo kang Chan nga sa tapos tuig nga pasirad-an apan gibalibaran kini sa rason nga gitagaan na sila og taastaas nga lugway sa kagamhanan. (GCM)