MOKABAT sa 43 ka mga armas nga way lisensya ug duha ka mga eksplusibo gitahan sa mga residente sa walo ka mga barangay sa bukirang dapit sa siyudad sa Sugbo ngadto sa buhatan sa Cebu City Mobile Force Company.
Kini sulod lang sa usa ka semana nga kampanya sa CMFC nga gitawag nilag Oplan Nickel sa mga bukirang barangay sa dakbayan. Ilag giawhag ang mga residente nga kon aduna silay gipangtipigan nga mga armas nga wa malisensyahi, labing maayo nga i-surrender na lang sa kapulisan.
Ang mga armas nga gi surrender mao ang tulo ka 9mm pistol, 15 ka .38 caliber revolver, usa ka .22 caliber revolver, pito ka .357 caliber revolver, usa ka 5.56 revolver frontier ug usa ka 5.56 improvised pistol, 7.62 improvised pistol, KG9 sub machine pistol, 9mm AR 15 sub machine gun, tulo ka .22 caliber rifle, usa ka US M1 caliber .30 carbine, usa ka 7.62 bolt action sniper rifle, usa ka 5.56 bolt action sniper rifle, usa ka Colt 30 bolt action rifle, duha ka .45 caliber pistol ug usa ka 12-gauge shotgun.
Ang mga barangay nga adunay mga lumolupyo nga mi surrender sa ilang mga armas mao ang barangay Tagba-o, Tabonan, Taptap, Pung-ol Sibugay, Malubog, Sudlon 2, Sirao ug Agsungot.
Matod ni Police Lieutenant Colonel Randy Korret, hepe sa City Mobile Force Company, nga moabot na sa kapin d200 ang ilang nakuha nga mga armas apan daghan pa ang wa makuha tungod kay sa ilang bana-bana moabot ngadto sa 25,000 ang loose firearms sa siyudad sa Sugbo.
Masaligon si Korret nga makab-ot nila ang ilang target nga mga armas nga way lisensya nga illegal nga gihuptan sa mga sibilyan sa dakbayan sa Sugbo. (AYB)