WA MAN makuha ang back-to-back nga kadaugan sa Miss Universe sa Talisaynon nga si Gazini Christiana Ganados, Kagamhanan sa Talisay mopasidungog gihapon kaniya.
Gitug-an ni Mayor Gerald Anthony Gullas nga dakung’ dungog ug garbo na alang sa Siyudad sa Talisay ang nahatag ni Ganados.
Si Ganados nidaug sa Miss Philippines ug nitigi sa prestihiyuso nga international beauty pageant, ang Miss Universe.
Ang korona sa niagi nga tuig nakuha sa Pilipinas pinaagi ni Catriona Gray. Si Ganados nakasud sa top 20, apan wala na mapili sa top 10 atol sa pageant, Lunes sa buntag, Disyembre 9.
“Even though she didn’t reach the Top 10, for us, Gazini (Ganados) will be forever our own Ms. Universe. I assure Gazini that even if she comes home empty-handed, the people of Talisay City will always look at her as our queen,” saysay ni Gullas.
Nagplano ang mayor sa pagpakigtagbo sa konseho aron sa pagtuki sa mamahimo nga ihatag nga pasidungog kang Ganados.
“She really deserves to be recognized as representing the Philippines, being on the top 20 and being a Talisaynon is an accomplishment itself,” dugang sa mayor.
Ang kagamhanan nipahimutang og daku nga screen sa people’s hall sud sa Talisay City hall alang sa Talisaynon nga buot motan-aw sa Miss Universe nga libre ug mo-cheer kang Ganados.
Nakuha ni Zozibini Tunzi sa South Africa ang korona sa pagka-Miss Universe. First runner up si Miss Puerto Rico, Madison Anderson ug ang taga Mexico nga si Sofia Aragon ang second runner-up. (FMD)