HONEYMOON sa bag-ong kasal wa mahinayon human nga ang bana nidaklit pa pagpamaligya og drugas sa gabii, human sa kasal.
Kini human nasikop sa buy bust operation si Nestor Abella, hingkod, lumolupyo sa sitio Lower Lipata, lungsod sa Minglanilla niadtong Sabado sa gabii, Disyembre 7, 2019.
Samtang uban kaniya si Polly Badayos, hingkod, kinsa nalakip sa pagkasikop.
Matod ni Police Major William Homoc, hepe sa Minglanilla Police Station, wa sila kahibawo nga gikasal pagkabuntag niana si Abella.
Nasuta lang nila sa dihang nasikop na si Abella, kinsa nagmahay nga imbes ikauban ang hinigugma ug karon asawa na diha sa unang gabii sa ilang pagkamagtiayon, prisuhan na hinuon kini natanggong.
Nianang Lunes, Disyembre 9, na napasakaan og kasong pagpamaligya ug paghupot og ilegal nga drugas si Abella.
Giila si Abella nga street level target si Abella sa Minglanilla police ug giingon nga bag-ohay lang kini sa ilegal nga negusyo.
Gihimo ang transaksyon ra usab sa lugar ni Abella.
Nasakmitan ang duha og walo ka mga pinakete sa gidudahan nga shabu nga mobalor og kapin sa P3,000.