MALIPAYONG pagsaulog sa International Human Rights Day! Unta makab-ot na sa kalibutan ang kalinaw ug walay pagpang-abuso sa tawhanong katungod tungod sa panagbingkil sa relihiyon, baruganan sa kinabuhi, bulok sa panit, rasa, kinatawhan (gender) ug estado sa katilingban.
Ang pagkatawhanon ang nakapalahi nato sa ubang sakop sa "animal kingdom" busa atoa kining barugan ug panalipdan batok sa mga mobungkag niini. Human sa flu, dengue ug uban pang sakit nga daghan ang mabiktima, lain na usab nga virus ang gikahadlokan karon sa Davao.
Niadtong Dominggo, Disyembre 8, nakadawat kami og text gikan sa Holy Child College of Davao-Health Office diin nagtungha ang duha namo ka anak nga nagpahibalo sa tanang ginikanan nga gisuspende ang klase gikan sa Disyembre 9 hangtod sa 13.
Ang rason kay aron mapugngan ang posibleng pagkuyanap sa "chicken pox" o hangga sa mga batang nagtungha sa maong eskwelahan. Ang tanang sanga sa maong eskwelahan magsuspende sa klase aron mahatagan og panahon ang mga opisyales sa panglawas nga makahimog lakang sa pagsumpo niini samtang sayo pa.
Maayo ang gibuhat sa eskwelahan kay lisod na kung daghan ang matakdan ilabi na nga taliabot ang kasaulogan sa Pasko ug medyo tugnaw na ang panahon. Dali motakod ang maong virus sa mga bata sa panahon nga bugnaw.
Kita nga nakaagi na sa pagkabata seguradong natakdan sa maong sakit nga mananakod.
Nakaagi usab kita sa bakuna nga sakit kaayo og masamad pa ang atong bukton. Ingon nila nga kadtong nakaagi na'g hangga dili na daw matakdan pag-usab. Apan nakahibalo ako nga naay natakdan na sa una nga bata pa nga natakdan pag-usab sa dihang hamtong na.
Ang akong igsuon nga opisyal na karon sa DILG natakdan sa maong sakit pipila ka tuig na nga milabay. Di kami makatuo nga matakdan siya kay nataptan na siya'g hangga sa pagkabata. Mas lisod ang iyang kahimtang sa ikaduha kay napuno ang iyang lawas sa ginagmay nga butoy sa hangga nga may dugo ug nana.
Bisan ang iyang lapalapa adunay butoy-butoy busa naglisod siya sa paglakaw ug paghigda. Gihanigan na lang og dahon sa saging ang iyang higdaanan kay kung ordinaryong banig o kama seguradong mopilit ug malarot ang iyang panit.
Maayo na lang nga walay butoy ang iyang dila ug tutunlan kay kung naa pa hastang lisura sa pagkaon. Morag panultion nga atong madunggan sa katigulangan nga "ang dila na lang ang way labod." Among nabantayan nga lahi ang hangga sa una ug karon.
Ang sa una, dagko ang butoy nga motubo sa pipila lang ka parti sa lawas. Apan ang bag-ong klase sa virus kay ang halos tanang parti pwdeng tubuan og butoy. Ni-upgrade na pud tingali ang virus nga imbis "shotgun" ang gigamit sa una, karon kay rapido sa "sub-machinegun" na.
Busa, sakto lang ang gibuhat sa maong eskwelahan nga magsuspende sa ilang klase. Ang buot ko lang madungog gikan sa mga opisyal sa City Health Office ubos ni Dr. Joy Villafuerte kung tinuod pa nga may "chicken pox outbreak" aron makabantay ang tanan?