AGI'G pasalamat ngadto sa mga suking tigpaminawan sa dxGM Super Radyo sa Davao City, ang Kapusong Istasyon midalit og pahalipay ngadto sa katawhan og "Maagang Pamasko, Super Radyo, Super Serbisyo Publiko" uban sa partnership sa Latter-Day Saint Charities.
Natigayon ang programa Disyembre 7, 2019 didto sa The Church of Jesus Christ of Latter-day Saints, Barangay Mintal Proper, Davao City.
Nalipay ang katawhan nga midalikyat sa programa human sila naka-benepisyo sa libreng serbisyo publiko diin anaa ang medical check-up sama sa medication counseling, drug information drive, ug free eye check-up.
Naapud-apod sab ang mga reading eyeglasses sa unang 300 ka mga pasyente ug anaa sab ang screening and surgery referral alang sa cataract, cyst, ug club foot.
Anaa sab ang paghiling alang sa knee prosthetic leg pre-screening, mental health awareness, nutrition feeding program, smoking cessation, ug nicotine replacement therapy.
Aron mas masadya pa ang programa, midalit ang Kapusong Istasyon og mga Christmas giveaways ug gift packs, naa sa'y free photo booth, ug free ice cream.
Ang dxGM Super Radyo nagpasalamat sa katawhan sa padayon niining pagpaninaw sa mga programa sa kahanginan sa Kapusong Istasyon sa Davao City.