DAVAO DEL SUR -- Sama sa duwang boksing, daghang nag-atang sa ilang telebisyon aron masaksihan ang koronasyon sa Miss Universe 2019 didto sa Atlanta, Georgia.
Napuno sab sa hugyaw ang mga beauty parlor sa mga merkado sanglit daghang beki ang nag-atang ug nagpakita og suporta kang Miss Philippines Gazini Ganados.
Sa Top 20, nahitabo ang dyutay'ng kahilom human wa matawag si Ganados, apan ang beki nga si Jolina sa siyudad sa Digos nabuhi ang dugo human naapil ang Pilipinas atol sa wild card.
Apan pag-abot sa Top 10, dungan sa pagtapos sa tahas ni Miss Philippines padung sa Miss Universe, naminghoy sab ang mga beki ug daghan ang nipadayon na lang sa ilang trabaho ug wa na mohuman paglantaw sa telebisyon.
Sama kang Jolina, daghan pang beki ang nagyawyaw atubangan sa telebisyon kay di madawat nga wa nakarga ang ilang idolo sa ubang round sa indigay sa kaanyag ug pangutok.
Ang Cebuana gi-koronahan niadtong Hunyo isip Miss Universe Philippines nga maoy misunod sa mga tunob ni Catriona Gray, nga maoy ikaupat nga Pilipinas nga nakahupot sa korona 2018.
Sa social media, napuno sa nagkadaiyang komento ug reaksiyon ang mga netizen human gi-proklama nga Miss Universe 2019 si Miss South Africa Zozibini Tunzi.
Bisan pa man og wa malakip sa Top 5 ang Pilipinas, giingong kampeyon gihapon ang mga Pilipino human midawat og daghang medalya sa Southeast Asian Games ug numero unong matinabangon sa mga biktima sa kalamidad. (Orlando B. Dinoy)