KABACAN, North Cotabato -- Gipahubo sa militar sa gisul-ob nga uniporme ang mga sakop sa Moro National Liberation Front (MNLF) alas 8:00 sa buntag niadtong Dominggo, Disyembre 8.
Sa taho gikan sa 602nd Brigade, nasayran nga miagi sa detachment sa 7th Infantry Battalion sa Philippine Army sa Kabacan ang mga sakop sa MNLF nga nakasul-ob sa ilang military uniform.
Gipahubo sa mga sundalo ang maong uniporme sa MNLF ug gipangsakmit.
Nasayran nga ang mga sakop sa MNLF paingon sa ilang kampo aron nga motambong sa ilang tigum tungod sa pagbisita ni Central Committee vice chairman Ustadz Abdulkarim Tan Misuari.
Gipasidan-an ni 7th IB Commander Lieutenant Colonel Niel Roldan ang tanan nga hugtanon nga gidili ang pagsul-ob og military uniform subay sa Republic Act (RA) 493.
Hinuon, segun sa nasabutan tali sa MNLF ug Moro Islamic LiberatioN Front (MILF), gitugtan silang mosul-ob niini sulod lang sa ilang kampo.
Nanawagan si Roldan sa mga opisyal sa MILF ug MNLF nga pasidan-an ang ilang mga sakop.
Giklaro ni Roldan nga kinsa kadtong molapas sa RA 493, kompiskahon ang uniporme ug mag-atubang og kaso, apil na ang mga sibilyan. (Edgar E. Fuerzas)