Pulis tipi sa mga kabaro

PATAY na ang patrolman human giingong misukol sa iyang mga kabaro nga pulis dihang dakpon na unta atol sa hot pursuit operation alas 10:35 sa buntag niadtong Dominggo, Disyembre 8, didto sa Purok 5, Consuelo, Bunawan, Agusan del Sur.

Napatay mao si Jhon Paul Gerida, Class-2015 Alagad, minyo, ug nadestino sa Agusan del Sur (ADS) 2nd Provincial Mobile Force Company (PMFC)-Caraga.

Una niini, gipusil sa napatay nga suspek ang iyang labaw nga si Police Lieutenant Colonel Rex B. Lomente, minyo, ug force commander sa ADS 2nd PMFC.

Subay sa spot report sa Police Regional Office (PRO)-Caraga, ang biktima ug ang suspek dunay gihisgutan sud sa opisina dihang kalit na lamang nadunggan ang kusog nga buto sa armas.

Giingon nga gipusil sa suspek ang iyang labaw gamit ang kalibre .45 nga pistola, hinungdan nga nakaangkon kini og samad sa ulo ug gidali og dala ngadto sa Bunawan District Hospital apan gibalhin sa Tagum Regional Hospital.

Ang patay nga lawas sa suspek gihaya na sa iyang pamilya, samtang ang biktima padayong anaa sa talandugon nga kahimtang sud sa ospital sa Tagum City.