GI-KNOCKOUT ni Filipino Eden Sonsona si Colombian Mauricio Pastrana sa 8th round kagahapon sa undercard sa Pacquiao-Clottey bout sa Dallas Cowboys Stadium.

Kaduha gyud gitumba ni Sonsona si Pastrana sa ilang eight-round non-title bout. Nahitabo ang premiro sa sayong bahin sa 8th round unya nisunod ang ikaduha sa ika-1:33 minutos sa round.

"The Manny Pacquiao Blog". Click here for stories and updates on the Filipino boxing champ.

Ang 21 anyos nga si Sonsona nisaka sa 21-5, 7KOs nga rekord samtang si Pastrana nahagbong sa 35-13-2, 23 KOs.

Ang laing Pinoyng si Michael Farenas nga nipakita’g aksyon sa “The Event” boxing promotion pakyas pagposte og impresibong away human niresulta og “no-contest” ang ilang panagharong ni American Joe Morales.

Farenas (27-2-3, 24 KOs) maoy nagkontrolar sa away sa premirong round apan sa 2nd round, hayan nagisian og dako si Morales (20-13, 4 KOs) sa ibabawng bahin sa iyang tuo nga mata tungod sa accidental headbutt.

Girekomendar sa ring physician nga undangon ang away human niadto.

Basi sa patarakan sa US boxing, ang away nga dili makahuman og upat ka rounds tungod sa accidental headbutt ideklarar nga no-contest.

Sa laing bahin, nakuha ni Mexican Humberto Soto (51-7-2, 32 KOs) ang bakanteng World Boxing Council (WBC) lightweight title pinaagi sa unanimous decision nga kadaugan batok kang American David Diaz (35-3-1, 17 KOs).

Kaduha nakapuntos og knocdown si Soto – sa premiro ug ika-12 nga round – aron dominahon ang scorecards, 115-111, 117-109, 117-109.

Sa welterweight nga engkuwentro, nidaog si Alfonso Gomez (22-4-2, 11 KOs) batok kang kanhi two-time world champion Jose Luis Castillo (60-10-1, 52 KOs) pinaagi sa 5th round TKO.