Green Lancers gipakaging sa Panthers

MGA duwa karon

6:30 pm. - USPF Jrs. vs. Minglanilla

8:00 pm. - SWU vs. USPF

Mipakatap og 41 puntos si Sameen Swint, unom niini gikan sa three-point area, aron ituboy ang University of Southern Philippines Foundation (USPF) Panthers ngadto sa 111-105 nga kadaugan batok sa defending champion University of the Visayas (UV) Green Lancers sa nagpadayon nga 2019 Minglanilla Mayor’s Cup Inter-collegiate Christmas League sa Minglanilla Sports Complex, Lunes sa gabii, Disyembre 9.

Ang kadaugan maoy ikaduhang nahagpat sa Panthers sa usa ka semanang torneyo.

Ang Lancers nga mipukan sa University of San Jose Recoletos (USJR) Jaguars sa una nilang duwa, nahagsa sa 1-1 nga baraha.

Daw og mitumaw ang anino sa nahitabong kagubot sa niaging tuig sa dihang sa katapusang singko minutos mainiton nga nagsinukliay og mahait nga pulong si UV Coach Gary Cortes ug si Swint.s.

Pisikal nga nakaduwa ang matag habig nga miresulta sa pagpahamtang og mga technical fouls sa pipila ka mga player sa duha ka teams.

Hinuon nasanta ra ang gubot ug nahuman ra ang duwa.

Si municipal administrator sa Minglanilla nga si Concordio Mejias nanawagan ug nanghinaot nga ipatigbabaw lang unta sa mga partisipante ang kalidad sa usa ka atleta pinaagi sa limpyo ug tinarong nga duwa.

Ubos sa panagkumboya ni la Gab Cometa ug Melvin Batuhan, ang Lancers nakaposte og 105-100 nga labaw.

Nagsugod pag-amag ang kadaugan sa Panthers sa katapusang 2:04 segundos human nakamugna og sunodsunod nga turnovers ang Lancers. Wa usiki ang maong kahigayonan sa Panthers, ug ang three-point play ug ang free throws ni Swint maoy nagtidlom sa tinguha sa UV.

Sa pagpalta sa beteranong si Jancork Cabahug tungod sa hilanat, si Michael Maestre maoy nangulo sa Lancers nga may 21 puntos, samtang tag 16 puntos usab ang natampo nila ni Gileant Delator ug Cometa.

Karong gabii, sugdan sa Southwestern University-Phinma Cobras, 2019 Cesafi champions, ang ilang kampanya pinaagi sa pagpakigsangka sa University of San Jose Recoletos (USJ-R) Jaguars nga sugdan sa alas otso ang takna.

Samtang sa preliminary match, ang Talisay City Aquastars mosuway sa katakus sa UV Baby Lancers sa usa ka tuneup match sa alas 6:30 sa gabii.

Ang mga puntos

USPF (111) - Swint 41, Chavez 17, Oliva 14, Estardo 9, Aguilar 8, Mendez 7, Ursal 5, Patalinghug 5, Maglasang 2.

UV (105) - Maestre 21, Cometa 16, Delator 16, Saga 14, Butohan 12, Tarrosa 10, Hassan 6, Pepito 6, Gellaconi 2. (JBM)