DAW nakigharong lang og usa ka punching bag si pound-for-pound champion Manny Pacquiao (51-3-2, 38KOs) sa iyang pagdominar kang Ghanaian Joshua Clottey (35-4, 20 KOs) kagahapon sa “The Event” boxing promotion sa Dallas Cowboys Stadium sa Arlington, Texas.

Atubangan sa 50,994 nga tumatana-aw, gibuhat ni Pacquiao ang tanan aron lingawon ang mga tawo apan ang depensa ug wala pagsukol ni Clottey alang sa usa ka saktong binukbokay maoy nakapauga sa kombati.

"The Manny Pacquiao Blog". Click here for stories and updates on the Filipino boxing champ.

“Hindi na man kasi lumalaban si Clottey. Ang gusto lang niya makatapos sa away kaya palagi na lang nagdidepensa,” matod pa sa suod nga higala ni Pacquiao nga si Cebu boxing promoter Rex “Wakee” Salud sa interbyu sa radio program sa Manila nga Sports Chat.

Wala’y knockout nga nahitabo nga mao unta’y gilauman sa kadaghanan apan impresibo gyud gihapon kaayo si Pacquiao, kinsa nakadepensa sa iyang World Boxing Organization (WBO) welterweight title.

Sa usa ka judge, nadaog ni Pacquiao ang tanang rounds, 120-108, unya nakakawat og usa lang ka round nga daog si Clottey sa laing duha ka judges, 119-109.

Gikan sa sinugdanan hangtod nahuman ang away, kanunay ra gyung nagtabon sa iyang nawong si Clottey ug panagsa ra gyud kaayo kining mobuhi’g kumo, nga tatawng sa kahadlok nga maabli ang iyang depensa ug masudlan siya sa kumo ni Pacquiao.

Tungod kay grabe ang depensa ni Clottey sa iyang nawong, giataki siya ni Pacquiao sa bodega apan mismong si Pacquiao ang nikonsiderar nga lig-on gyud kaayo si Clottey.

“He’s a very tough opponent,” matod ni Pacquiao sa interbyu sa Associated Press. “He was looking for a big shot.”

Nangita ra’g tayming

Niangkon si Clottey nga abtik gyud kaayo si Pacquiao hinungdan nga nangita na lang gyud siya og tayming apan wala gyud niya lugaki ang iyang depensa.

“He has speed, I lost the fight,” batbat ni Clottey. “He’s fast, that’s why I was taking my time.”

Sa punch statistics, si Pacquiao nakabuhi og 1,231 ka mga kumo unya 256 ang nakasulod kumpara kang Clottey nga nibuhi lang og 399 ka mga kumo diin 108 ang nakasulod.

Ang trainer ni Clottey nga si Lenny de Jesus miangkon nga nagpanagana gyud ang iyang boksidor sa pagbuhi’g mga kinumo.

“Joshua Clottey had the power to knock him out but was reluctant to punch,” pasabot ni De Jesus. “We clearly got beat. I don’t think he won a round.”

Ang American trainer ni Pacquiao nga si Freddie Roach miuyon sa asoy ni De Jesus nga wala gyu’y nadag-an nga round si Clottey, hinuon nakadayeg siya sa depensa niini.

“He had a good defense, but defense isn’t enough to win a fight,” pagtino Roach.

Mayweather nahisgutan

Human sa away, nahisgutan gyud dayon ang kabahin sa nakaselar nga away nila ni Pacquiao ug American Floyd Mayweather Jr.

Mismong si Pacquiao ang nipabuhagay nga naghandom gyud siya ning awaya apan nag-agad ra siya kang Mayweather kon mosukol na kini kaniya.

“I want that fight, the world wants that fight, but it’s up to him,” asoy ni Pacquiao.

Kon wala pa nakanselar, sila gyud unta si Pacquiao ug Mayweather ang nagsangka kagahapon.

Wala kini nadayon kay nalubog ang negusasyon tungod sa isyu sa blood testing nga gipamugos sa kampo ni Mayweather.

Alang sa kampo ni Pacquiao, ang gibuhat sa kampo ni Mayweather usa lang ka timailhan sa pagpanalaw. (AP)