USA ako sa minilyon ka mga Pinoy nga gusto modaog si Gazini Ganados isip Miss Universe 2019.
Sama sa kadaghanan, gusto usab nako nga makuha gihapon sa usa ka Pinay ang korona, human kini makuha sa laing Pinay nga si Catriona Gray sa milabay nga tuig.
Apan, ang taga South Africa ang migula nga mananaog.
•••
Tungod niini, daghang mga komentaryo ang migawas, labi na gyod sa social media.
Ang uban, dili makaon sa iro. Sama niining usa nga matod pa, buhok lang kuno ni Ganados ang nakasabot sa iyang opening statement.
Susmariosep.
Angayan ba kini? Husto ba kini? Dakong sayop.
•••
Midaog na si Ganados, kon atong subayon.
Midaog na siya isip “pinaka” sa tanang mga kandidata nga misalmot sa bugno dinhi sa Pilipinas. Gipildi na niya ang tanang mga kandidata nga gusto usab mosungkit sa korona isip Miss Universe-Philippines.
Matod pa sa mga nakaapil na sa maong bugno, labi nga gyod ang nangapildi, dili sayon og hilabihan kalisod ang ilang naagian ingon man ang preparasyon aron lang makaapil sa maong bugno.
Human sa maong kadaogan, padayon ang gihimong preparasyon alang na sab sa mas dakong bugno diin ang magsangka niini mao na gyod ang mga “pinaka” sa mga babaye sa tibuok kalibotan.
•••
Gawas sa mga kalisod sa preparasyon nga gihimo, gipas-an sab ni Ganados ang mas dakong hagit batok kaniya – nga masungkit gihapon sa usa ka Pinay ang korona.
Back-to-back win, matod pa.
Buot ipasabot, gawas nga tugbangan ni Ganados ang mga hinashasan na sa ubang mga nasod, tugbangan pa gyod niya ang nahimo na sa kanhi Miss Universe nga si Catriona Gray. Doble ang iyang tahas, matod pa.
Tungod niini, sayon ra masabtan nga doble o kaha triple ang pressure nga gibati ni Ganados samtang nagtungtong siya didto sa bantawan sa gihimong bugno.
Og posible nga mao kini ang hinungdan ngano nga lisod sabton ang iyang opening statement.
•••
Bisan pa niining tanan, dako na kaayo nga kadaogan ang nakuha ni Ganados sa dihang napili siya sa top 20.
Tiaw bay mapili ka nga top 20 gikan sa tanang miapil.
Hasta sab ang pagdaog niya sa Best in National Costume special award.
Gipakita ni Ganados ang katakos sa pagsul-ob sa maong costume, sama sa iyang pagpakita sa kahanas sa natad sa arte sa usa Pinoy nga naghimo sa maong costume.
Matod pa, gihatagan og tukma nga hustisya ni Ganados ang naghimo sa maong costume nga angayan sab kaayo nga ipasigarbo sa tibuok kalibotan.
•••
Gipakita ni Ganados ang tanan niyang mahimo aron lang masungkit ang korona, bisan pa sa tanang mga kalisod nga iyang nahiagoman atol sa preparasyon niini.
Angayan lang nga pasidunggan si Ganados sa iyang nahimo, imbes nga siya libakon o biay-biayon.
Husto kaayo ang gisulti sa kadaghanan.
Bisan pa kon wala masungkit ni Ganados ang korona isip Miss Universe 2019, magpibilin gihapon sa ilang kasing-kasing ug alimpatakan ang kadaogan ni Ganados isip Miss Universe-Philippines.
Labaw sa tanan, gipakita ni Ganados nga angayan ipasigarbo sa tanang mga tawo sa tibuok kalibotan ang kaanindot sa usa ka Pinay.