ANGAYAN ba nga mobiya sa katungdanan si Konsehal Niña Mabatid sa siyudad sa Sugbo kon di kaya ang mga isyu nga naglambigit kaniya?
Konsehal Mabatid, sa imong katungdanan malauman nimo ang mga pagsaway gikan sa katawhan ug media.
Nagpapili ka sa katungdanan abli ang libro sa imong kinabuhi sa bisan unsang mga pagsaway.
Sama sa gihimo ni kanhi konsehal Jun Alcover nga naglatos sa mga isyu batok kanimo isip lihitimong sakop sa media.
Alang sa wa masayod, si Alcover lihitimong sakop sa media isip broadcaster sa daghan nang nga dekada.
Unsay buot pasabot ni Mabatid ang pagkiha kaniya ngadto ni Alcover maoy paghatag og mensahe aron mahulga ang mga sakop sa media?
Ang kasong libel di man gud makapahadlok sa mga sakop sa media sa pagsulti sa kamatuoran.
Gisugal man gani ang kinabuhi sa mga sakop sa media bisag unsay mga panghitabo basta di lang mahikawan ang interes sa katawhan.
Na-interview sa Agila si Alcover ug miingon iyang komentaryo nagbasi sa reklamo sa katawhan.
Kini sama sa mga reklamo sa Pinoy Care nga imong gipanag-iya ug ang kasong sexual harassment sa suod nimong higala nga si Bong Basamot.
Kini dako nakong kahibong sa kadugay nang panahon nagsaway si Alcover ni Mabatid karon man lang mikiha nga gipasakaan og kasong anti sexual harassment ang iyang amigo.
Si Bong Basamot ang kanhi kapitan sa Camputhaw nga gipasakaan og kaso sa iyang mga empleyado sa City hall isip division head.
Si Alcover isip sakop sa media igo lang misulti sa pamahayag sa usa ka biktima sa pagpangharas ni Basamot nga si Mabatid maoy naningkamot nga masibog ang kaso.
Sala ba diay ni Alcover isip sakop sa media nga maoy gisultian sa usa sa tulo ka biktima nga misud si Mabatid sa kontrobersia ni Basamot?
Di ba mas dako ang nahimong sala ni Mabatid sa Anti-wire Tapping Law ug konseho sa siyudad sa Sugbo nga gipadungog ang estorya sa biktima?