NAGSULAT ko ning atong asoy pipila ka oras sa wa pa ang championship fight nila ni Manny Pacquiao ug Joshua Clottey ka-gahapon. Wa na ko kapaabot sa resulta sa away kay gikinahanglan nga makabalik na ko sa tambalanan nga akong kasamtangang pinuy-anan sa milabay nga upat ka adlaw human ma-diagnose ang akong baby sa makalilisang nga sakit nga dengue.

"The Manny Pacquiao Blog". Click here for stories and updates on the Filipino boxing champ.

Na-una lang ko og ingon nga knockout (unanimous decision-Editor) subay sa gipasibantog ni Promoter Bob Arum sa The Event.

Sa akong paminaw mura ko og naigo sa nag-aso-aso nga kinumo ni Man-ny sa dihang gipahibalo ko nga positibo sa dengue ang gihilantan nako nga si Baby Khazzy niadtong Huwebes sud sa emergency room sa Chong Hua Hospital. Di masabot ang akong gibati sa maong pahibalo. Gawas sa pagdawat nalang sa kamatuoran nga ang sakit nga dengue way gipili ug way gikahadlokan, kabus o adunahan. Knockout ang tanang mobabag sa iyang dalan.

Sama sa akong naagian nga trabaho kaniadto isip professional ring announcer sa Games and Amusement Board, usa ka masipang pahibalo gikan sa tambalanan ang akong nadawat, nakalahutay si Khazzy sa labing kutas nga kumbati batok sa dengue. Midaug siya human sa upat ka adlaw nga pagpakig-away sa makamatay nga sakit. Uninanimous decision o knockout victory ba ang maong pahibalo, maglisod ko paghulagway.

Ang labing importante gidungog ang akong mga pag-ampo. Susamang pag-ampo ang akong gipadayag alang sa uban pang pasyente nga biktima sa dengue nga naa karon sa tambalanan. Di sayon, di lalim ug labaw sa tanan di matugkad ang kaguol ang akong gibati samtang nagsud-ong sa kahimtang sa pinangga nako nga Khazzy.

Salamat sa tanan nga misimpatiya sa dag-om kaayo nga upat ka adlaw nga akong naagian didto sa tambalanan. Salamat sa inyong mga pangaliya.

PAY PER VIEW

Dasok og puno ang mga imnanan, public plaza, karsada ug sa mga panimalay nga nisagop niining pay per view nga paagi aron mosaksi og championship fight sa boxing.

Live and direct sa dapit diin gipahigayon ang away. Lahi ni sa akong gipasiugdahan kaniadto diha sa Cebu Coliseum. Siguro si konsehal Lolot Tulda ug si Papa Ben niya wa pa makalimot sa labing una nga public viewing sa away ni Edito Villamor ang kanhi hari sa RP Miniflyweight Division og number one sa WBC , IBF ug WBA.

Nahitabo ni didto sa Cebu Coliseum saw a pa mauso ang cable TV. Ang eksena tinguha ni Edito nga langkaton ang bakos sa Thailander nga si Sor Voraphin. Kay wa may pay per view niadtong panahona, akong gisugyot nga samtang magpaabot sa long distance call gikan sa Thailand sa resulta sa away magbutang og TV monitor ug VHS player aron among saksihan ang mga kanhi away ni Edito. Beer, lechon ug daghang pagkaon ang giandam sa skating rink sa coliseum. Mao ni ang among gikalingawan uban sa mga bisitang sports writers. Puwerting lingawa sa tanan nga nagpaabot kauban sa inahan ni Edito ug mga silingan.

Pipila ka oras ang milabay kalit lang namingaw ang among nahimutangan human manawag ang kampo ni Edito gikan sa Thailand labot sa iyang kapildihan. Nanguli ang gatosan ka fans ni Edito nga minghoy ang panagway. Tawag ra sa telepono ang nakaingon.

Dili live ug di man delayed telecast. No commercial break labaw sa tananan.

CLEAN UP

Kudos sa organizers sama sa Lebumfacil Foundation og Jolibee Toledo alang sa laing coastal clean up ug mangrove planting nga himuon didto sa Barangay Cabiangon sa lungsod sa Pinamungahan karong Martes.

Ang local government unit ug DENR nagpaluyo sab ning maong programa. Kining barangaya silingan ni sa Barangay Tajao diin nahimutang ang sand bar nga karon usa na ka protected area.

Niadtong buhi pa si Jojo dela Victoria siya maoy nagpahibalo nako nga angayan gyud nga himuong sanctuary ang nahimutangan sa sand bar. Sa mga taga Cabi-angon manghinaot ko nga inyong ampingan ang inyong kadagatan nga maoy gisaligan sa liboan natong mananagat.