AWAY sa magtiayon ang usa sa gitan-aw karon sa kabomberuhan sa Siyudad sa Talisay nga hinungdan sa sunog nga niugdaw sa 45 ka mga balay sa Purok Kapayas, Upper Cadicay, Barangay Lawaan 3, Dakbayan sa Talisay, Lunes alas 11:38 sa gabii, Disyembre 9, 2019.
Nibilin kini og dul-an sa 200 ka mga tawo nga wa nay mga pinuy-anan.
Sa nadawat nga impormasyon ni Lawaan 3 Barangay kapitan Regie Marababol, giingong nagsugod ang pagsilaub sa kayo balay diin giingong nag-away ang usa ka magtiayon.
Apan wa lang una nibutyag si Marababol sa ngalan sa duha sanglit gisuta pa unsa ka katinuod sa taho.
Gitug-an ni Fire Senior Insp. Arra Alapajaro, Talisay City fire marshal, nga 45 ka mga balay ang naugdaw.
Ang sunog nakontrolar human sa dul-an usa ka oras nga pagkombate sa kayo.
Gideklarar kini nga fire out ala una na sa Martes sa kaadlawon, Disyembre 10.
Matod ni FO2 Junriel Siaboc sa Talisay City Fire Station nga giingong nagsugod ang kayo sa magtiayo apan, ang duha ang giingong wa na sa maong lugar sa dihang nakadako na ang kayo.
Ang sunog ang nibilin og P100,000 nga danyos.
Gipasabot ni Alpajaro nga daling nakatapon ang kayo sa mga silingang balay kay hinimo lang sa light materials.
Apan giklaro sa kabomberuhan nga padayon pa silang nihimo sa pakisusi sa hinungdan sa sunog.
Lakip sa naapektuhan ang magtiayong Andrea Cabradilla, 66, ug Esperidion Cabradilla, 82, nga parehong mga buta.
Ang magtiayon padung pa unta nga manguli sa ilang balay gikannanaygon sa kabalayan sa Siyudad sa Talisay, gikan sa alas 5 sa hapon hangtud na pasado alas 10 sa gabii.
Sa ilang pag-uli, gipugngan sila sa mga silingan nga mosud kay lakip ang ilang balay sa nasunog. Si Marababol nitug-an nga temporaryo lang una nga gipapuyo ang mga nasunugan sa ilang basketball court, diin gibutangan og mga tent aron dunay katulogan.
“Layo man gud ang covered court sa barangay distansiya gamay. Unya nagtuo gyud ko nga dili ni sila moadto didto kon didto ta magbutang og evacuation area mao nang diri na lang gyud sa duol atong pangitaan og paagi’, saysay ni Marababol.
Si Talisay City Mayor Gerald Anthony Gullas uban ang City Disaster Risk Reduction Management Office (CDRRMO) sa Talisay City ug City Social Welfare Services niduaw sa mga nasunugan Martes sa buntag.
Pasiuna nga gihatag sa kagamhanan ang gamit alang sa pangkatulog, mga pagkaon ug tubig gihatag ngadto sa mga biktima sa sunog. Nihimo na usab og panglista sa mga ngalan sa naapektuhan alang na sa pinansyal nga hinabang.